Йывыд-мыед сен йиъи МыхаI машмашбыр хъиджишир ад. Хьад ачых йишид вахтинды сюхьте бытIрана сибгIырай, машмашере йыхана бычI гьыъыд гедене, уула хъулгъур йиз, сывхыIр мыкь сиене машмашед агъагъур ад бычI сихъигъир сахъаIгъуIрей хука са емиш ки хъиджвикисне.

Ми йыгъырма ихьды къумшиди мийманваIле йиркьыр анириъи авар-миллитдиклады Каспийск шегьерди ешемишды джигьил-хьыдылды. Гьа ихьды мида-мидиъды МыхаIд муIкъуIд дамад-дарад шилвалы на чIирид-чIыкыд бытIраваIли, мирима ад хьидид ва гьавыдид серинваIли бала гуямиш ришир анириъий. Са гьаIфтидид арыди гьабыр хьиба-юкьа хылис дыхьыр ай аъ Лалаъан дериде, ва сецIедылады, балад хырыдад мамзила джытхьыйне ки. Гьадаа гьабише ягъмиш гьыъыр ай...

Гьавымыкла ихтилат кейихьвна йыггад ихьды инсанахьван, сиъинбише рухьуд ихтилат са йиъи — джалахьуъды гьаваабыр мадиш, гьаваа сен сыдыла дегиш вуруъура а хьус. Инсындис сиене кьадарна йыгара — сигIын, гьугъал, йиз, хьыбыл, гыбыл, амма Элигъание еда хулкардиш, шыв гьаваа мыс викисды.

ГьабхыIд хаIфтидис ихьды редакциядид «МыхаIбишды цIинды хабарбыр»- хьур дур гъад газетед къуллухчийше, мыйды инсындыре, МФЦ-ди дыхьыр джваIршис дюз гьыъыр ай болельшикед картабыр.

18-ды июлес МыхаI муIкъаI республикадид АО «Ремонтно-строительное управление»-дид «Рутульский» хьур филиалад базади выгыр ай иджлас. Гьадид натиджа ки виъий: 2024-ды сыдыд рыIхьды вазыра йыгыд гвалахмыд итогбыр йыгын. МыхаIд районди сытIа дишир ай республикади ад раIхъбыр, гъаIбыр усла ана ухуIд, ва гьамыд ремонтбыр гьаъад, генеки цIиндыбыр силхьед къуллухчиер.

23-хьусды июлес МыхаIд райондид администрациеди йиркьыр ай Мирзеханов Селимхан Салманханович. Гьа йиъи директор Дагъыстандид региональный социальный фондад «Все вместе» хьур. Райондид кьухьды Сулейманов Давуд Амаевич кIыбла хъуъ дерде ани йиъий Селимхан Салманханович МыхаI йиркьын бадана, гьис хьурди гьанийхьван гьаъасды меслагьаIтбыр ва кьуле гыргасды суалбыр бала ани йиъий.

Дагъыстан Республикадид кьухьды Сергей Меликов хьаIсил йишир джуду кабинете Магомедов Мухаммадыхьван (Леонардохьван), СВО-дид иштракчиехьван, йигитешды подвиг выъыд даIгьвиед вахтинди, ва гьанийды ниныхьван Шахназ Халиловахьван Са йыгъа гуджлид даIгьви ад вахтинди россиядид эскерер итхьури бейхабарна украинадид террористешды йыкьаI. Дагъыстанашурад МыхаIд райондады Йирек муIкъаIды эскеред Магомедов Мухаммадды йигитваIлид гьунырдыхьван душманар батмиш дыъыр ва ихьды гадиер гъаъ ихъитхьур....

Дагъыстана а, са хизанка ка, хьибды диндид инсанар, цIихьиб ерлид халкьбыр ва хьибцIырала балад миллетбыр. Гьадид бала гудж а ихьды гъараады душманашис, чалышды е кьатI даъас. Хабар виъи гьабишис ихьды республикадид уфтанваIликла ки — миди ад варлыд гьадатмыкла, гъеблид ешемиш дикис ермыкла, бытIрад банымыкла, темизды былахмыкла на нацIурмыкла, деръягьакла ва мадды балад джваIршихда адишды уфтанды...

Райондид кьухьды Давуд Амаевич Сулейманова выр ай кьваIд орден Мужества ихьды МыхаIд райондады Украинади гыргарар ад СВО-ди йигитерне дыркьыд эскерешис. МыхаIбишды йигитвалды абгаси таабата. Лучек мукьаIды Шихаев Зиредин Гайдаровичес ва МыхыIреклады Керимов Гасан Исаковичес выр ай гьа орденбыр. Гьабишды йигитвалды мысга ярад-дустад, райондид джамаIхтид фикирди не йикIе викиси, гьабише джуьхьды джигьил гьуIмир выр ай ватан...