Саласадид йыгъа, 18 февралес, Мыха1д А.М. Мирзоевды дурухда хъуд кьва1дхьусды мехьтебе йыгыр ай нинды ч1илилад диктант. Гьа диктант йыгыр ад йиъи 21-хьусды февралес агъмиш гьаъад сиене халкьмыд нинды ч1илды йыгъ гуьзет гьыъыр. Диктант кихьис хыва1 лешури 7-хьусды класса ад телебийше. Гьа дарса иштрак гьыъыри мехьтебед директор Икрам Давудова, завуч Рита Абасовара, методист Мирзият Мирзоевара, классад руководитель Хадижат Гусейновара, нинды дарс вылц1ад саъды классма ад хынимешис ма1гьа1лимеше Мелек Эминовара на Рахилья Султановара ва ихьды газетед баш редактор Тимур Махмудова, корреспондент Расим Таибова.
Гьа мероприятиебыр йыгыр ад йиъий ихьды газетед редакциедире не мехьтебере сыт1ана.
Диктантад дур йиъий «Хумухтид дам». Бала уфтанна, хынимер гедкьасна нинды ч1илыла диктант кьыле гьыъыри Хадижет ма1гьа1лимере. Диктант бегьем йишидыла хъуъ к1аъды класса ад хынимеше кьыле гьыъыр ай мыха1бишды дур ад шаирешды шиъирбыр. Гьа хынимешы гъай лейихды мыха1бишис эвелды валыг. Сагъул виъи сиене ма1гьа1лимешис йыхана гьазырвалдыбыр гьыъынис гюре гьа диктант йыгын бадана. Класс ара лывт1а выъыр ай, сихьир гьади ихьды атабабыйшды яшайишва1лид вахтиндид карбыр: кьа1б, эгре, тейкъул, сатул, сукуйбыр, гываъанбыр, дыбыч1 ва мадды ми-ти.
Гьемисед мероприятиебыр балана йыгыр йыгара ихьды нинды ч1ел суджувгасна. Ч1ел сувгуйне, гьадыхьван сугаси ихьды халкь ки, гьадат-нубат ки.
Дилег гьаъара дидабашда на нинабашда, районди адбишда ва шегьерма абишдаки, хынимешихьван мысга хала мыха1д ч1илыла далга, хьур, урус ч1ел гьабишис гьилакиъди вац1аси, амма нинды ч1ел баладбишис йик1ила увулхара а.

Насир Ибрагимов