Саласадид йыгъа, 11 февралес, Дагъыстанад Правительствадид Седри Абдулмуслим Абдулмуслимов ха1сил йишир ай «Дагестан»-хьур издательский халды кьухьнийхьван Умаросман Гаджиевахьван на «Истина»-хьур республикадид газетед баш редакторад заместителехьван Зикрула Ильясовыхьван.
Гьабише агъмиш гьыъыр ай суалбыр китабыр игъийир йыгад Ватандид защитникешды Сыдыс ва да1гьвидид Гьалибва1лид 80-сен йиъид байрамас. Меселла, лаъ гет1ир ай суал ВОВ-дыла СВО-ды йыхы1р йигитешиклады таарихед китаб игъийинид.
Умаросман Гаджиева сагъулбыр гьыъыри республикадид премьер-министрес Абдулмуслим Абдулмуслимовас хыл-худ вырыхы1ре хьур Дагъыстандид издательский халыс.
«Дагестан»-хьур издательский халды кьухьнийды Умаросман Гаджиевад ихтилатахьван, кьабыл гьыъыр ад специальный проектахьван Ватандид защитникешды Сыдыс ва да1гьвидид Гьалибва1лид 80-сен йиъид байрамас, игъиес хьур а китабыр сиене Йигитешикла — Совет Ху1кийметед, Афганистандид ва СВО-дид.
«Игъиеси йыхды к1алыб гъад китабыр дагъыстанабише выъыд йигитва1ликла сиене да1гьвима ва СВО-дид йигитешикла игъитхьуси джураана китаб…», — гьухьури Гаджиева.
Абдулмуслим Абдулмуслимова гьа гвалах лазимдине хывкьыр гъийгъад йыгъа, ихьды Ватан уву1ху1быр йик1ыыла утха джыдыъын ихьды бырдж йиъи, гьухьур гьание.
Умаросман Гаджиевад ихтилатахьван, мистед сыда игъиес йыгара а 13-быд китаб сиене Дагъыстандады Россиядид йигитешикла, СВО-ди дишид.
«Бегедене зы ха1сил йишир ай сабыйды эскерахьван, е далгыри игъиесды РФ-дид гьа1р Йигитеклады китабырмыкла. Гьа раха1тды гвалах диш, амани гьа гвалах сип1ир а — кьва1д китаб бегьем руъура а, кьва1д ки гьазыр гьаъара а. Маддымыд дердеки а. Сиене Йигитешикла хабар вишир йыгара Россиядики ва Дагъыстандики, йисхьурди гьабишды йигитвалды таарихди абгаси», – гьухьур гьание.
«…Дагъыстана сиене сыт1а анидиъи 73 Совет Ху1кийметед Йигит, амма гьабишикла аниъи 10-15 китаб. Мададбишиклаки кихьир игъийир йыгара китабыр ихьды писателеше не журналистеше…», – гьухьур Гаджиева.
Проект кьуле йыгыдаа, Ватандид защитникешды Сыдыд ва да1гьвидид Гьалибва1лид 80-сен йишидид, Дагъыстана гъаъ йыкьаси 20-25 издание. Гьасад эккед гвалах Дагъыстанад книгоизданиедид таарихди садаки вишиддиш.
Гаджиева премьер-министрес ихтилат гьыъыри мадды выгыргара ад гвалахаклаки республикада гъаъсуры. 2024 сыда издательский халыра иштрак гьыъыр ай 4-ды балад ху1кийметмыд выставкама, гьазыр гьыъыр Дагъыстанад таарихеклады мероприятиебыр, экспозициямыла гъайри.
«Йес йыгара Дагъыстан гъаъ сурууки вац1ыр спортад, му1къмыд ва улестымыд суруула гъайри китабырмыд республикана ки», – гьухьур Гаджиева.
Абдулмуслим Абдулмуслимова сагъул-варулбыр гьыъыри Умаросман Гаджиевас выгыргара ад гвалахад сураа адгын бадана дагъыстанабишды таарихди дагъыстанабишды йигитвалдыбыр, гьыъыр ад Ватан бадана. Премьере ч1ел выри издательский халды кьухьнийс куьмег выс хьур.
Б.МыхаIды
