12-хьусды февралес Мыхаlд районди йыркьыр ай РД-над промышленностед ва савдымыд Министр Халилов Низам Рахманович. Мыхаl лийкьасма министр аlчlур ай район кувурчlед саргьаlта гъад кьухды му1къаl Хъылда.
Мыхаl йыркьыда Низам Рахмановиче районад администрациеди выгыр ай инсанашды прием. Сахьусды Министре кьабыл рыъыр Мыхаl ешемишды Ризакова Светлана Магомедовна. Гьание ихтилат гьыъыр джуды къавгъуед — Мыхаlд сельсовете хозяйственный учета ведущий специалистне гвалах ваъара ана ридж кирхьур оптимизациедик ва гьадыхьван гъийгъа гвалах адишне аргыр а, хьур. Хала кlаъды кьваlр хыных а, шууна дуламиш рикисды джус гьацlардиш, хьур, ми агьвалатахьван. Низам Рахмановиче бытlрана хъацудыла хъуъ, Светланас джу гьа суалад бадана райондид кьухьнийхьван меслягьаlт гьаъас, хьур, шыв гъаъас йикисды кьарар эгъетlин бадана.
Кьваlдхьусды Министрехда йыркьыр Мыхаlды Ибрагимов Абдулнасир. Гьанийыхда мадды юлдашешихьван анийиъи малкъара Галы. Хаlр йыгъа кьу1не хылис маджбыр дуруъура машинехьван гьадиъ дуруъус. Амма рыкъыlд бетерваlлире, юкьсура шифер йишир ад, машин чlир вуруъура ва вазыра 2-3 ремонт ваъара ала хьуъ. Гьадис гюре хуткур, мыс бегьем гьаъасды йиъиди кьат1 кимадад асфальт Мыхаlа1ды Лучек му1къаl. Шафи Кафлановиче ки, гьади иштрак гьаъара ад гьа арыды, ва Низам Рахмановиче ки мистед сыда гьа асфальт бегьем гьаъас, хьур, тендер йыгыр бегьем дишид кал республикади гьа гвалахбыр гъилы лихъийис, хьур.
Хьели Кальялдид сельсоветед седрие Гаджиев Ибадуллаха лаъ гетlир суал, шууна кьуле гыргас джишир ади 2016-хьусды сыдыла хъуъ Кальялда Бабаюртовский отгонный зонади дыхьыр ад инсанашда гьилине прописка гьаъас, «зеленкабыр» халмыд адишдыла. Министре гьа суал лап джетинды йиъи, хьур, гьадыла лешур джуды контроле, лаъ гетlесне республикадид кьухьдыбишды улихьде.
Йыркьыр министред приема Мыхаlд имамки Таиров Абдулселим-Гьаlджи. Гьание маа лаъ гетlир газад суал, районди мидийкьама джигыр ад, гьис районда хъихире ади лазимды инсанашис идарабыр — военкомат, прокуратура ва маддыбыр.
Инсанашды приемала хъуъ Низам Рахмановиче не районад кьухьние Давуд Амаевиче выгыр ай муlкъмыд сельсоветмыд седрийшихьван иджлас. Гьади агъмиш гьыъыр ай хьадид призывад армиди ва контрактмыд эскерваlлид суалбыр. Хайиш гьыъыр сельсоветмыд ВУСмыд йацlбыр цlине хъаъ, хьур, ва военкоматахьван сытlа дацlара даъ, хьур, кидибхьубыр хьадид призывак. Гене йикlыы лихъийир, шыв джетинвалдыбыр йикисды армидикла гаlчlубишихда — правабыр лешус йикисдиш, тангымыд картабыр гъигъе гьаъас ва мадды джетинвалдыбыр йикис.
Иджаласа агъмиш гьыъыр ай сентябрес йикисды сечкимыд суал ки.
Гьадыла хъуъ Министр йыхьыр ай Мыхаlд ЦРБ-ди.
Б. МЫХАIДЫ
