21-хьусды февралед йыгъа ха1р са миллитдире къутли гьаъара Нинды ч1илды Йыгъ.
Ихьды районди мистед сыда ки гьа байрам кьуле выгыныс гюре, гьазырвалды выъыр ай балад идарамыра. Мыха1д районди ад мехьтебырмыра, садикмыра, библиотечный сетере, ЦЭВД-дире ва мадды гьасад идарамыра джуьхьды телебийшихьван сыт1ана сахьусна иштрак гьыъыри гьа маджлисма.
Гьа гвалах кьуле выгын бадана, гьабише мыслаа иди хъуъ гьазырвалды ваъыр ай. Маджлис выгыргасды кабинетмы выгыр ай лейихды усул: сихьир ай эвелды вахтинды ихьды инсанаше ишлемиш гьаъад къаб-къаджагъ, хын-хыдыч1 гийир ай джиле а, масалыс йыхыр ай лейихды стэндбыр, хынимешыы лыъыр ай ата-бабыед вахтинды ад услахьванды валыгмар, рышбишды кьулу сачах хъуд шалбыр на генджебыр выр ай, гъилабырмы хылыра рыхыр ад гываъанбыр лыъыр ай ва гадийше кьулу лихьир ай ч1ач1ахыйбыр, гъилаба гъай джагварыйбыр. Гьадыла саваенди, суфрумы сихьир ай ихьды миллитмыра улед улесдыбыр.
Хынымеше джанде гьашкь ана кьыле гьыъыри йик1ыылана ха1р гьыъыр ад мыха1 ч1илылад нагьнибыр, шиъирбыр, махвбыр, мисалабыр.
Ха1р са магьа1лимере хынимер кьуле эдир ай, гьис иди ихьды к1аъды миллитмыра нинды ч1ел йик1ыыла убха джывыъыр йигад, гьис йиъиди таарихды гьадат-нубат геджейир йигад. Хынымеше убра лешури ихтилат «Миллитдихда джуды ч1ел мабдишды, гьа рухьуд ихтилат йиъи, гьасад миллет выдж мабдиш», хьур. Хынымеше джуьхьды учура ч1ел выри нинды ч1илыс балана убур выси, хьур, шурад ч1илыла далгас чалыш дикис, хьур, нинды ч1илыла дуьзене кихьис ва кьыле гьаъас ха1р гьаъас, хьур.
Гьемисе уфтанна Мыха1д районди къутли гьыъыр ай Нинды ч1илды Йыгъ.

Зарема Исрафилова