Дагъыстандид Правительствадид Седрие Абдулмуслим Абдулмуслимова Кайтагский районди хатыдихьван дыркьыд хьибды джигьилед бадана мисе гьухьури:
«Гьеми йыгъырма Кайтагский районди вишид писды-пашмалды гвалахад хабар ившир а ес, хьибды джигьил гадиед муьфтене гуIмир пыч вишир а, газад угар себеб йишир. Гьабишды ешбыр йиъий 21 на 17 сенбыр. Гьабишис секинийис угар итхьудид шак ки йишир адиший. Сес выъыр йидкьыд духтуршдааки куьмег хъичIир адиш.
Кьана-кьул гьацIыйне, гьа хусуси хала ай газад пич-камин, хал сигIа гьаъас хьур ивхьир ад. Мидыла улихьде ки, фуланды камин себеб вишир, писды хатабыр бала йишид йиъи. Гьамыъки, гьацIара-гьацIара гьасад зарарбыр вылцIaд пичбыр масак вылцIад туканбыр анийиъи, гьабише гьасад кьухьды, инсан йикье гьыъыдид гунаа ливилъэре джваIршы, савдыдид рыкъаI.
ХуIрметли дагъыстанабыр! За хайиш гьаъара хаIр са иеcсиеда, хъуъ сидживир, гьайвыр хыл выгырга хала ад сиене газаа гвалах ваъад пичмы-кардыы. Гьисхьурди, мисагьаIтди, кьыIдид йыкьаI, газахьванды гьакьасабыр бала йиъи. Аллагьара хырыда гьыъый гьасад гвалахбыр, выдж газад угар хабарсызана ирхьвара, гьадид ил ки кине гьацIаддиш.
Газахьван аIхтиетвалды гуьзет выъыр йигад, хала ад кIаъды-кьухьнийис гьацIара йишир йигара ва мааки артухана хынимер кьуле эдир йигара гьадид бадана.
Гьадыла саваенди, кид-кине дыгыр специалистешис гьагва гьыъыр йигара сиене лазим йиъид кал дуьз-дьузгюн йиъиме, хьур, хала гид газад приборбыр. Халмыд иессийшихда йишир йигара газовый службадихьван китIир ад договор технический обслуживаниедид бадана. Ва газ ишлемиш гьаъади, мадад аIхтиетвалдыбыр ки гуьзет гьыъыр йигара, газ луькIур ад беридыы, кид-кине рак-гъуIл ыъыр йигара, темизды гьава вишин бадана хала, халбыр сигIа гьаъас, гьасад хаталлыдид пичбыр ихьир йигардиш, хьум лаъ деъед курмаIль саламат вишир йигара. Газад цIамна ил йишир мадана, гьайвыр газ йиъид дурбыдыы гъад кран гъигъе гьыъыр, гъуIл-рак ачых гьыъыр йигара. Ва халаа гъаъ дыхьыр, хырыда ка гаIчIур, гъараа 112 ва яки 104 номермы зенг гьыъыр йигара.
Амани бала хеюф диъи дыркьыр, дуьнйадыла вахтсызана гьаIтхыIд джигьилер, Аллагьара джваIршис раIхмет выъый. Гьабишды хизынмыд йикIис саабыр вий. Лазимды куьмегбыр выс йе гьазыр диъи.
Меселла, зы умуд йиъи, изды чIелбыр сиенебише убра лешур а, хьур», — гьухьури премьер-министре джамаIхтиде.
Зарема Исрафилова
