Гьеми йыгъырма МыхаIдид специальный военный операцияди гьуIмир выд Йигит Исмаилов Абдул-Маджит Гамзатовичды дур гъад ЦЭВД-хьур идарадире йыгыр ай акция — «Ихьды сураады хуIрмет Йигитешис»-хьур.
Райондид ЦЭВД идарадид кьухьды коллективере, телебиер ва магьаIлимер сытIахана ягъмиш гьыъыр, сигыр ай СВО-ди иштрак гьаъара ад эскерешис лазимды вы-зыбыр. Гьа посылкама ихьир кIыб чIир джикисды улесдыбыр ва гьа джетинды агьвалатак темизвалды увухуIс кюмег высды сабын ва зубной паста, щётка, мадды гьасад гьабишис сахьусды лазим йиъид карбыр. Мида бейдене гьа ещикIбыр хьуъ эскерешы лийкьа гьаъасды йиъи.
Гьа акциеди сахьусды гьалгыри Сабир Ахмедов, гьание мисе гьухьури: «Гьеми акция кьуле гыргади, ихьды сиенебишды йикIе ад са ният иъий — халдаа хырыда ад ихьды Ватан увуIхуIре ад Йигитешды гуьгьуIл лаъ йыгын.
-ХуIрметли ихьды идаради кьыле ваъара ад телебиер ва къуллухчиер, ес-ваIс сиенебишис гьацIара , февраль вазырыла хъуъ 2022 сыдыд Россиядире гыргара а Украинади специальный военный операцие. Гьа операцие йыгынид себеб — кюмег вын Донбассди ад инсанашис, гьабыр шумуд иди сенбыр йиъий фашистешды раIхъ лювшур ад залымашды хылихьде гитхьур ад.
СВО-ди иштрак гьаъара ад МыхаIд райондаады джигьилер ки бала а. Ихьды сиенебишды Аллагьахьде са дилег йиъи — гьабырки ва мадды сиене СВО-дид иштракчиерки сагъна лехъедкьый джухьды халы-хизынмы. Гьадыла саваенди ЦЭВД идарадис выр ад дур йиъи СВО-ди йигитне ра1хмитдис гьархыIд эскер Абдул-Маджит Гамзатовичды йиъи, гьадыла мааки артухана чалыш дишир йигара СВО-ди ад эскерешис ху1рмет ваъас.

Зарема Исрафилова