15-хьусды мартас районди ад Галды мездике Мыха1д райондид кьухьние Сулейманов Давуд Амаевиче выр ай ифтар — джуды садакьа Мыха1д выдж ешемишды мукъу1д джама1хтис ми сивид Рамадан вазыра.
Садакьа сийир ай ваъара ад ц1инды медреседи — сахьусды гьавыди хьылешис, кьва1дхьусды — выгIлешис. Гьади выъыд ха1дийды кубала хъуъ Давуд Амаевиче йыдкьыд мездике кубас диндид инсанашде мисе гьухьур:
«Ху1рметли юлдашер! Ми Рамадан вазыра гьаъара ад выхьди кубыр, ниятбыр, хиялбыр ва дилегбыр Аллагьара кьабыл гьыъый, да1гьви к1ыбди лабт1ур, дуьнйа эсля1х хъивикий, сиъин ихьды га1дийшис, специальный военный операциеди иштрак гьаъара ад, сагъна, шадна ва гъаалиб дишир халма хъидыкьас къисмат йиший, дыркьыд йигитешиcки Йинчид ра1хмет виший».
Райондид кьухьды гьалгыдыла хъуъ сиене куба гъабыр дыхьыр ай садакьады Давуд Амаевичды хайишдыхьван. Эккед хала сийир ай беземиш уфтанна гьыъыр кьва1д суфра. Бик1ерды гъеблид пловахьван на мадды улед-рагъадмыхьван инсанаше джуьхьды гьа йыгъад сив сихъийир, шадана, яхъ-зарафат ваъара, гьаъара бегеде хад юлдашешис ихтилатбыр ва муIкъа1, дуьнйады ад хабарбыр ва мадды га1ш-мыкьбыр. Джураана ифтара джуьхьды разивалды гьувга выъыр ай к1аъды хынимеше — гьабыр бала диъий кьухьдыбишыхъаъ мездикеки ва ифтараки.
Сивбыр сихъийыдыла хъуъ инсанаше сагъул-варулбыр гьыъыр Давудыс, «Аллагьара кьабыл гьыъый»-рухьура, яваъшене сахъдалхьвара ка1ч1ур.
Ми Рамадан ваз сивид-садакьамыд виъи. Баладбише выр ай ифтарбыр халма, ма1хлима, гьыъыр ай садакьабыр, сигыр пай гьаъас инсанашис джуьхьды суруула хьыв тукунмы, гьадыла рухьура — джуьхьды хакьыд сивбыр, гьыъыд кубыр, садакьа-нафакьабыр Аллагьара кьабыл гьыъый.

Б. МыхаIды