Дагъыстан Республикади гьакьды-кьулна гвалах ваъара ка1ч1ур а Благотворительный фондара Россиядид Йигитед Эседулла Абдулмуминович Абачевад дур гъад, куьмег высды да1гьвиди иштрак гьаъадбишис, гьабишды хизынмыс ва мадды зиян-зарарбыр йишир абишис. Фонд Россиядид Йигитере джу гьыъыд йиъи. Гьадид натыйдже виъи руъуд сиене куьмег вын да1гьвиди иштрак гьаъадбишис, ветеранашис, инвалидешис, яраллы дишид инсанашис ва гьабишды хизынмыс, са ки мадды зиян-зарарбыр йишир абишис. Сахьусды гьа гвалахад себеб — инсанашис куьмег вын джама1хтик кине йыгадка джва1ршис аъ-гъаъ дыкьас хъишин, психологический ва юридический куьмегбыр вын, гьабишис дарманбыр ва мадды лазимды карбыр гьагун, санаторно-курортный джигима сидыгын ва куьмег вын гвалаха даъас на ц1инене кьылебыр хъаъас.
Джураана убур выси Фондара ватан хъывгара выъынис джигьилешис, суга ва ч1ир джыъынис ихьды таарих ва йик1иыла утха джыъынис ихьды Ватан увуху1ди гьыъыд эскереше йигитвалдыбыр.Фондара гвалах джуду выгыргаси ху1кийметед идарамыд кьухьдыбишихьван, халкьдид организациемыхьван, медицинский ва социальный учреждениемыхьван кьуле йыгын бадана благотворительный программабыр. Гьадыла саваенди йик1ыы гъа гьаъас волонтерский группабыр, гыргас культурный, кьылебырмыд ва ха1р даъад магьра1катбыр.
Фондад идара гинивиъи гьеми адреса: Республика Дагестан, г. Дербент, ул. Кадетская, д. 2.
Эседулла Абдулмуминович Абачев - генерал-лейтенант йиъи, Российский Федерациедид не Луганский Народный Республикадид Йигит йиъи, Ленинградский военный округад къушуммыд командующиед заместитель йиъи. 35-хьуд сен йиъи джат1ур Ватан увуху1ре эскерва1ли ад ихьды офицер. Специальный военный операциеди гьание иштрак гьаъара ай сахьусды йыгъала хъуъ ва лап джетинды джигима да1гьвиед к1еэ.
2025 сыда декабрь вазыра Эседулла Абачевас выр ай Александр Невскиед орден, гьад гьанийис выр ай джуды хылихьван Россиядид обронадид министре Андрей Белоусова.
Дагъыстандид экс-глава Сергей Меликова гьухьуд ка, «Ватан увуху1нид ра1хъ, гич1 джившин джанде, гъигъды фикирбыр йишин ва джат1ур гюзет выъын присяга Абачев Эседуллады эккед пример виъи сиене гьанийды эскерва1ляды юлдашешис ва алалаъды Россиядид защитникешис».
- Ху1рметли юлдашер! Гъийгъа гвалах выъын хакьыр дур Россиядид Йигитед Эседулла Абдулмуминович Абачевад — гьа лап эккед кар ва планка йиъи. Ха1р къадам, ха1р кьарар ва фондад инициатива йишир йыгара лейихне гьадис.
Хайир йиший ихьды гвалахакла, ари дыъыр инсанар, хыл-хыле выр чалыш дикисне. Командадис йыхды кьуве, дирибашвалды, сиене йик1ыы гъадухъундыбыр кьуле йыгын къисмат гьыъыр фонд ачых гьаъади гьадид директора, СВО-дид иштракчиере Ренат Ханмагомедова.

Б. МЫХАIДЫ