Дагъыстандид Премьер-министр йыхьыр гакъыр луза гьаъара ад ц1инды мусоросортировочный комплексахда.
Магомед Рамазанов, республикадид Правительствадид Кьухьды, йыхьыр ай гакъас еринды гьаъара ад ц1инды предприятиедыхда ч1идк1ыд отходбыр переработка гьаъасды Карабудахкентский районди. Ч1идк1ыд ругухьла-ч1ыхы1кла хайир кет1ин мыслахъуъиди эккене лазимды гвалах виъи ихьды региона.Ц1инды объектед кьуведихьван утилизировать гьаъас йикис хьур умуд а 500 гьагъзыр тонн сыдыд арыди, гьадис гюре гьадиъ йихис йикиси мусор Махачкалда, Каспийскада ва мадды бегеде хад му1къма.
Гъийгъад йыгъахьван объект луза гьаъара ад гвалахбыр кьуле йыгыр а 89% йыхы1р. Амма дыхьыр таныш дишийне, гьац1ара йишир мадад подрядчикере хъыъыр йыгад лазимды гвалахбыр: инженерный системабыр на ва вентиляциебыр гьади ыхы1н, бегьем гьыъын монтаж противопожарный системадид, гьадыла саваенди ры1къмыд ва аа-уу хад ербыр усла йыгынид гвалахбыр.
Объект вахтинди, ыха1 дишир, кьабыл гьаъас йишин бадана ООО «РЭО»-дид ц1инды кьухьдыбыр ва подрядный идара тапширмиш дыъыр ай ц1ам дирибашене бегьем гьаъ хьур мадад гвалахбыр. Выгыд иджласа агъмиш гьыъыр ай йыгыр йыгад гьакьасабыр, вахтинди бегьем гьаъасды гыргара ад гвалахбыр.
Гене йик1ыы лахъахара, Дагъыстанди садана луза гьаъара а сиене сыт1а рыхьы1д объект ч1ыт1к1ыд ругмыд (ТКО) эйлуг гьыъыр хайир лешусды. Гьамы сиенемы джат1ур макъыет йиъи регионад врио Кьухьды Федор Щукин.
«Ихьды бырдж к1а1рды гъилы лийир ачых гьыъын диш гьа объектбыр. Е чалыш диъи ваъас хьур гьактьна-кьулна гьамыра гвалах бегьем йишидыла хъуъ. Гьадис вахт выгара, амма е джат1ур макъыет дикиси сиене гьаъара гвалахмы ва вахтинди кьуле гыргас ка1ч1ур гыргара ад гвалахбыр», - гьухьур Магомед Рамазанова.

Б. МыхаIды