Махачкалди йыдкьыр а 49 дахыд палестинцыер, гьабишик хынимер ки кинидиъи. Гьа хабар 22 сентябрес выъыр ай ННТ-дид пресс-службадире.
«Россиядид кьухьдыбише выд куьмег себеб вишир ва благотворительный фондмыра хыл йывхы1р йыдкьыбыр садгъур секин дыъыр ай «Караман-2»-хьур отдыхад базади. Хынимер ва кьухьды инсанар яваш-яваш ха1р дуруъура а ц1инды ераа яшайиш дикис», — Телеграм-канала выъыд хабардихьан. Пресс-службадид ихтилатмыхьан, дахыбыр шешин хадишне йидкьыр ай, джуьхьды кар-куш, а1к1-да1к1 ки тини сатыр, лехъа1шус джишир.
Гьадыла саваенди, палестинцыйше эккед сагъул-варулбыр гьыъыр РФ-дид президентес Владимир Путинес ва сиенебишис джуьхьды дерде дишибишис, гьабишик кине дагъыстанабишис ки, Газада гъаъ дыкьас куьмег вынис гюре.
Гьадыла хьурагине, 19 сентябрес, 50-ла балад россиянар Газада гъаъ эхъет1ир хъидкьыр ай РФ-ди. Гьац1ара гьыъыр ай, йыдкьыбишикла 10 инсан сидигаси Санкт-Петербургди, маддыбыр сидигасды ербыр — Иваново, Архангельск, Ингушетия. Баласдыбыр гьабишикла — 34 дахыдбыр — дикиси Махачкалди.

Б. МЫХАIДЫ