1,1 млрд. манут выплатамыд йывхы1с хьур месла1гьа1тды йидкьыр а хьанна лугъуд гьугълумыра зиянбыр выд халбыр дуьз-дуьзгин хъыъын бадана дагъыстанабишис.Дагъыстандид Правительствадид Седрие Магомед Рамазанова иштрак гьыъыри Правительствадид комиссиедид иджласа. Гьа иджласа хьуъ гет1ир ай мисед суалбыр:
- шууна а1хтиетвалды выъыр йигарди делид гьугълумыра зиян-зарар джывын бадана ихьды ху1киметед джурад субъектма ва тирдже Дагъыстанди лугъуд гьугълумыра выр ад эккед зиянбыр хъуъ хъыъынид гвалахбыр шууна кьуле гыргасды.
Гьа иджлас выгыри Россиядид гражданский оборонадид гвалахмыд, ЧС-дид ва стихийный бедствиямыд последствиебыр хъуъ хъыъынид министред заместителе Алексей Кострубицкова. Сахьусды балад убур йыхы1р ай кьва1дхьусды суалас. Магомед Рамазанова гьухьури, регионара Россиядид Минстрое сигыр ай переченьбыр, ари гьагва гьыъыр ад зиянбыр йишид хал-лахбыр, ЧС вишид зонади гид. Гьадыхьван сыт1ана лугъуд гьугълумыра ЧС адишды джигыма ки йидкьыр ай юхбыр, гьа юхмыра ки са-сур зиянбыр выр ай сасад халмыс.
Правительствадид комиссиедид тапширмадихьан гьасад халбыр ки ийир а республикадид Росреестра МЧС Россиядид. Гьадис гюре сивыгыр а заявка Россиядид Минстрое ва гьадыхьван сыт1а дестикь гьыъыр а кьарарбыр юхбыр руъуд джигыма халбыр гид инсанашис мадда халбыр хъывысды.
«Россиядид Правительствадид Седрие Михаил Мишустине 30-хьусды апрелес выгыд иджласад протокол кьуле гыргасды йиъидыла, за хайиш гьаьара, Россиядид Минстроес тапширмиш гьаъ, хьур, гьазыр гьаъ хьур лейихды план. Гьа магьра1кат кьуле выгыргасна ва юхбыр руъуд джигыма ешемишды инсанашис мадда халбыр хъывысна программадихьван «Обеспечение доступным и комфортным жильём и коммунальными услугами граждан Российской Федерации»-хьур ва гьадихьван сыт1а хайиш гьаъара Россиядид Минфинеда гьа гвалахбыр кьуле гыргас лазимды тангабыр федеральный бюджета йыха1ъ, хьур», – гьухьури Магомед Рамазанова.
Гьадыла савае, республикадид премьер-министре ихтилат гьыъыри, шыв куьмегбыр вылц1ара ади хал-лахмыс, зиянбыр выд инсанашды, гьабыр ремонт гьаъас ва гийтхьур ад халмыд ериндире ц1инды халбыр хъывысди.
Гьеми сагьа1тди 66,7 % йыхы1р кьуле йыгыр а йидкьыр ад гьа1рземыкла. Гьамыкла капитальный ремонт гьаъасды выплатабыр выс хьур а 1467 гьа1рземыхьван, гьадис йигара а 1,1 млрд. артухды манутбыр. Октябред ахирайыкьама капремонт йигара а хьур выр ад гьа1рзебыр сиене кьыле гьыъыр бегьем гьаъаси, ва 300 сертификат высды йиъи ц1инды халбыр йигара адбишис. 2026-хьусды сыдыд ноябред ахирес сиене ц1инды халбыр йигара хьур выр ад гьа1рзебыр кьыле гьыъыр бегьем гьаъаси.
Единовременный выплатабыр высды йиъи 94 гьагъзыр инсындис, гьамыра хывкьыр а 3,8 млрд манут.

Зарема Исрафилова