Табасарандид райондид судара эскеред сур хакьыри, чалышды кехъейис джуды кредитбыр. Гьа гвалах бадана эскерес куьмег выри прокуратурадире: сыт1ана выд искара куьмег выри гьакь гьат1ур гьац1ара гьаъас, приставашис ихтияр адишды гьанийда бырдж хахъакьас.Сахьусды кьул гьа гьа1джет дюзгинне кьуле гыргас раха1т гьыъыр ц1инды контрактара, кит1ид эскере 2024-хьусды сыда 1-хьусды декабрь вазырыла хъуъ. Гьакьна-кьулна ад гьамыъды нормамыхьван, гьа кардире эскерес вылц1ара ихтияр джат1ур кехъейис бырджбыр гьанийы гъад 10 миллион манутмы йыхы1р, хьурагине кит1ид контрактбыр гюзет джыйне ки руъура гьа вахтинди.
Гьац1ыр йыганакун, банкас гьа кьарар кьабыл джаъас йыгара ай, яни рухьура, гьа кредит лешуд йиъий, хьур, предпринимательский гвалахбыр гьаъас. Амма судара гьа кар ч1иридне гьасаб гьыъыри, гьухьур, спецоперациедид иштракчийшды сур халкьад закондире гюзет гьаъардиш гьасад исключениебыр - льгота тааликь вуруъура Ватан увуху1дбишис, гюзет джыъыр шыв бырдж йиширдики.
Эхирехьван судара приставашды гвалахмыд къанун ч1иридне хакьыр. Гьамыъ ведомство маджбыр виъи луза хъаъас хахъалкьара ад бырджмыла гъайир, лаъ гет1ес суал, шууна сехъет1есды арест гьанийды имуществадыла, залогна ад банка.
Гьалаки гьа кьарар эгъет1ир кьул-джубурна бегьем диш, ва минкир виъи обжаловать гьыъыр хъургъа хъыъынис ки, амма гьасат агьвалат ад гедене шыв гьыъыр йыгарди гьац1ыр а инсанашис.
Гьа Табасаранский судад кьарардире гьагва гьыъыр а сиене эскерешис, шыв гьыъыр йыгарди гьасад месъэле вишийне, ва гьилды рыкъа1 дыхьыр йыгарди. Балад вахтинди гьа льготмыд нормабыр ишлемиш гьыъынид сураа руъурай балад къанунмыд гьа1джетбыр: банкмыра закон джва1ршис йыгадка ишлемиш ваъара, гьабгура багьанабыр «предпринимательскийбыр» ва яа «инвестиционныйбыр» йиъи хьур лебшуд кредитбыр, кахъджагъун бадана эккед тангабыр. Дагъыстандид судад кьарардире йиъидкал, гьакьдыкьулна гьагва гьаъара: СВО-дид иштракчийшды сур хакьын, гьабишис куьмег вын сахьусды хьура гид ва лаъ хъуд гвалах виъид кредитный идарамыд къазамишмыла.
Экспертеше рухьура, мисед гвалахара балана раха1т ваъас яшайишвалды, гьу1мир эскерешды, мысга бюрократический барьермы сыдырха1д, чалыш диъиди джуьхьды гвалахбыр гьакьды кьулна арыди гыргас. Гьамыъ, судара гьасад инсанашды сур рыхы1ди, приставашис не банкмыс гьац1аси, шууна дегиш выъыр йыгарди джуьхьды гвалах гьасад инсанашихьван.
Гьидыхдана гаджадкьы1р, быш дишир йигардиш, телесых джитшир: гьала гьа кьарар эхиратды кьуле йыгыр адиш, кредиторахда маба ихтияр апелляция хъывыс. Амма ми агьвалатара - прокуратурадире сур хакьын эскеред, гьагва гьаъара а, шууна ху1киймет чалыш гьекъийкъатана виъиди выдж эскерешды сур хакьас. Баласды эскерешис, биссамятди тини передовоя гъад, гьа гвалах са юридический гъалибвалдыла гъайир рухьуд ч1ел виъи, хала хъидкьыда джва1р маа ха1сил дикис диш, хьур, бырджмыхьван на арестмыхван кардымы, халмы лирхьед, ва анивиъи рухьуд чьел виъи гьабишыхда ихтияр «финансмыд амнистиедис», сиене куьмег а ху1кийметекла.

Б. МЫХАIДЫ