Дагъыстан Республикадид врио Кьухьние Федор Щукине ихтилат гьыъыр бегедене эккед гьугъалбыр лугъудыла хъуъды агьвалатад, балад зиян-зарарбыр выд ихьды регионас. Гьание гьухьур, гьавабыр йыха хъишир ки, ад агьвалат гьалаки хывкьыр йыгара гъигъды контроля сиене кьухьдыбише.Гьаабхы1д ха1фтидис Дагъыстанди эккед гьугъалбыр йишир ай, гьадихьан сыт1а нац1урбыр лап бала йишир, хьидмыра, юхмыра гейир ай балад ра1хъбыр ва зиянбыр выр тукмыд усмыс, вышкамыс, сатхъа1 гьыъыр йаькбыр сасад районма на балад му1къма. Сасад районма гьала ки сасад джигима адиш хьедбыр на газбыр.
Врио Кьухьние эккед сагъул-варулбыр гьыъыр сиене специалистешис, зиян -зарарбыр йишид ермы сидыгыд гвалахбыр гьаъас: «Энергетикеше, ры1къмы гъабише, инженереше, спасателеше ва коммунальный службамыра йыгъа-выше гвалахбыр гьаъара а, сасад гедене лап джетинды джигима, эккене чалыш дуруъура. Сиене дагъыстанабишды суруула йыгара ва1с сагъул ваъас ва1 сивирхьере ад замхы1тдид бадана, ваъара ад гвалахад бадана».
Джураана Федор Щукине йыхды кьимет выр гыргара ад гвалахмыс куьмег вынис гюре ерлид инсанашис, волонтерашис ва благотворительный организациемыс. «Мисед гедене генеки гьац1ара руъура: сиъин Дагъыстан - са эккед ху1рмет ад хизан виъид», - гьухьур гьание.
Гьа1р йыгъа республикадид кьухьды гъанийиъи связа сиене ведомствамыд кьухьдыбишихьван, вац1ара ваъара юкьсура еринды ад агьвалат. Зиянбыр выр ад муниципалитетма гвалах ваъара а районмыд ва межведомственный комиссиемыра, гьац1ара гьаъара ад выд зиянбыр, гьамыс вылц1ара кьимет.
«Убур джыхы1р сатасдиш яя са хал, яя са ер. Еда ля1гъу1д сиене гьаъас сиене джигима, зиянбыр выр ад эккед гьугълумыра вахт хъуъ сидживир ва лаазимды сиене куьмегбыр выси зиянбыр выр ад инсанашис не районмыс», - гьухур Федор Щукине.
Б. МЫХАIДЫ