Уула ывсыд на гьугъал гьугъара ад гьавыдыхда гаджадкьы1р, Махачкалдид  «Динамо» ва Москвадид «Спартак» дюлхъед матчехда гадкьа1с йидкьыр ай гьагъзырала артухды болельщикер. Дюлхъуьнид тамаша гьаъабишды арыди кинийиъий  Дагъыстандид врио йиъине кьухьдывалды ваъара ад Фёдор Щукин ки. Гьа гьади йиркьыр ад йиъи командадид гуьгьуьл лаъ гыргас, хьур, мида йикисды джетинды матчбыр гуьзет гьыъыр.
Фуланды мерприятиеди иштрак гьыъыри Великий Отечественный дагьвиед иштракчи   Муса Багаудинова ки, гьанийис выр ай ихтияр сахьусды туп йывхы1с. Йиркьыр ад ветерана артухды ухшер выгыри фуланды маджлиса.
«Гьемисед мийманахьан бейде сукьус къисмат йишир а, хьур, зы эккене шад-гуямиш йиъи»,- гьухьур  Федор Щукине.
Кьвунды командадид дюлхъуьныхда  трибунадыла гадкьа1ре ай республикадид премьер-министр Магомед Рамазанов на Сергей Меликов ки, ихьды региона футболас убур йыхы1р, дайра хьуъ выгыд виъи гьание, джу кьухьвалды ваъад вахтинды.
Матч бегьем вишида хъуъ Фёдор Щукине гьухьури: «Гъийгъадыла хъуъ зы мааки артухана хъа1ч1ур а «Динамодыхда». Мидийкьама ихьды спортад клубас лазимды хыл-худ вырыхы1д кал мидыла хъуъ ки куьмег выс, хьур, фикирбыр а республикадид кьухьдыбишихда».
Дагъыстандид кьухьние гене ки йыхды ч1елбыр гьыъыри командадыхда ва гъалибвалды арзуламиш выъыри мида йикисды матчма ки.

Зарема Исрафилова