Россиедид Минсельхоз кьуле гине региона лийкьа гьыъыр а 16 тонн тумадид картышк1амыд. Гьа картышк1а везесды виъи хьедбыр литхьур зиян-зарарбыр йишид районма. Гьа хабар ливир ай «Дагестанская правда» газета.
Астрахандады картышк1а шумдыиди хозяйствамыс пай ваъасды виъи: Акушинский, Левашинский ва Тляратинский районма ад. Мида бейдене ка гене кьва1б машин тумадид картышк1адид выкьасды виъи Брянский областа. Гьабыйды картышк1а пай ваъасды виъи Лакский, Кулинский, Гумбетовский, Ботлихский ва Хунзахский районмыд быстанмыд арыди.
Дагъыстандид Джама1хтид фронтад регъбер Джамалудин Шигабутдинова гьухьури: «Регионас куьмег выс йигара, хьур, юкьсура хабарбыр сигыр ай, ва баласды ихьды ху1кийметед аграриебыр гъилыы гъани йиъий куьмег сигас, хьур».
Дагъыстандид сельский хозяйствадид ва продовольствиедид министр Шамиль Рамазанова ки джуды сураа гьухьури: «Гьеми куьмег вахтинди ана лийкьыр а. Гьемисагьа1тди дагъыстандады ладжбарар езелмы гъуьткир а, картышк1абыр, памадурбыр, хиярбыр ва мадды джилыды емишбыр езере. Ихьды регионас лазимды гедене хыл-худ йывхы1д регионмыд аграриемыс эккед сагъул виъи ва гьа виъи кьухьды ху1рмет Дагъыстандис выъыр ад.
Йик1идады сагъул ваъара е сиене хыл-худ йывхы1д, куьмег выд инсанашис. Джурад сагъул рухьура Джама1хтид фронтада замха1т сивхьир акцие кьуле йыгыд»,- гьухьур Рамазанова.

Зарема Исрафилова