Гвалахад ми ха1фте Владимир Путинды кувч1ур встречадихьван, кьабыл гьыъыр Дагъыстандид ц1инды кьухьды Федор Щукин Кремлиди. Президенте гьанийис къутли выъыр республикадид кьухьва1ли керъинвалды ва гьагва гьыъыр сахьусды кьуле йыгыр йыгад гвалахбыр: регионад экономика лаъ выъын, йыха выъын социальный инфраструктура ва хыл йывхы1н эскерешис, гьабишды хизынмыс ва да1гьвия хъидкьыбишиски.Дагъыстанад врио кьухьва1ле Федор Щукин гьыъыр ай 4-хьусды майес, ва 15 октябрес регионад парламентере - Халкьдид Маджлисере - гьа керъир республикадид кьухьва1ле.
«Гьа виъид кар джурад регион виъи, Кавказди ад Россиядид форпост виъи, гьа балад халкьбыр ад республика виъи. Амма зас вада гьухьус йыгара, гьелбетдики, сахьусды кьул убур йыхы1р йыгара гьади ад ерлид к1ыбдид диндис баласды дагъыстанабишды, уху1р йыгара эвелды гьадатбыр, дагъыстанабишды культура, ва гьасад гвалахахьван куьмег гьыъыр Дагъыстандис лаъ гыргас экономика, промышленность, гьадис гюре кьуле гыргас инсанашды яшайишед суалбырки», - гьухьур Владимир Путине.
Гьание гьухьур, республикади бала хынимер дюхюдыла, бала йиъи инсанашды къавгъу-дердибырки. Президенте гьухьуд кал,чалыш дишир йыгара мехьтебырма телебиер са сменады хъыдгас, ц1ам хъаъас кьва1бхьусды ва хьибхьусды сменабыр, йыха гьаъас амбулаторный не ва поликлиникадид куьмег, гьадыла саваенди бала гьаъас ербыр хынимешды садикма.
Путине джурана хайиш гьыъыр убур йы1х, хьур, специальный военный операциедид иштракчийшис, гьабишды бегедебишис ва эскерешис да1гьвида хъу1дид сасадбыр яраллы дишир. Президенте гьухьур, Дагъыстандид инсанар анидиъи арми ливере Вооруженный силама, иштрак гьаъара а СВО-ди, гьамыъки гьувга ваъара джуьхьды йигитвалды, да1гьви ваъара а «ухьтанна, гич1 джывыъыр, йигитеше ка». «Дагъыстанабише мысга мидыла хьуъки балад сыдырма гьагва гьаъара, шууна йыхана хъывгарди джуьхьды к1аъды ватан на ва ихьды сыт1ад эккед Ватан - Россия. Дагъыстанабише йыхана хакьыр а ху1киметед сур иштрак гьаъара кьуле гыргади сахьусды лазимды суалбыр», - гьухьур президенте.
Путине йик1ыы лихъийир, Щукине хьурагинеки гвалах выъыр республикади, кьухьды йиъине гьади Верховный судад ва гьадыла таныш йиъи ерлид къавгъу-дердимыхьван. «Амма хьухьус йыгара, ми виъи исполнительная власть, гьа диш судад гвалах, ва миди, гьелбетдики, сиене хасиетбыр инсындид ки ва гвалах дюзгинне арыди выгынидки сиене джигима гьагва гьыъыр йыгара», - гьухьур президенте.
Щукине джуды суруула сагъул-варулбыр гьыъыри президентес ва республикадид инсанашис джу умуд выъыдыла. «Ми, джат1ур, гьасад аванс йиъи, кьуле йыгыр йыгад кьуляа-джубра», - гьухьур гьание. Дагъыстанад кьухьнийды ч1елмыхьван, джуьс гьац1ара, гьилды гвалахбыр дюзгин хъыъыр йыгад йиъиди ва чалыш йикис, хьур, кьуле гыргас сиене хьура сихьир ад кьарарбыр.

Б.МЫХАIДЫ