18 сентябрес Россиядид президенте телемоста хьуъ ачых гьыъыр валаетдид регионма ц1инды газ йыгыр ад объектбыр. Гьа магьра1ката иштрак гьыъыр Дагъыстандид врио кьухьние Федор Щукине ки. Ц1инене газ йыгыр ай Тверской, Нижегородской, Ульяновской, Владимирской ва Амурской областма, генеки Дагъыстанди не ва Чувашиеди.«Гьа сахьусды лазимды гвалах виъи ихьды инсанашис, регионмыс ва сиене валаетдис. Россиядыхда эккед запасбыр а газад. Ва ихьды бырдж - гьадире хайир вын ихьды валаетдис, лаъ выъын ихьды экономика на инсанашды яшайиш. Газ йыгынид программа виъи срок адишды. Е гьа гвалах мидыла хъуь ки джат1ур выгыргаси, гыргаси газ ихьды шегьерма, сиене ерма, гьелбетди ки, Сибирди не ва Дальний Востоктики» - гьухьур Владимир Путине.
Газ йишир эккене рази дишир Ц1умадинский районди ешемишдыбыр, газ йыдкьыр садана хьибды му1къа1. Инсанашды суруула банымы гъад му1къу1д Ричаганих СВО-дид иштракчиед ришире Загидат Абдулхаликовара сагъул выъыр валаетдид кьухьнийис убур йыхы1нис гюре республикадис. «Ихьды му1къ лап гьатхыд банымы гъад виъи. Гъийгъад йыгъ е к1ыблахъуъ гюзет гьаъара ай. Владимир Владимирович, ес гьац1ара, ихьды му1къма газ гыргара ад йиъи ва рухьура. Сагъул Вас ихьды райондид бадана. Сагъул ихьды газовикешис ки: гьабише дурба выгыр ай дарыма хьуъ ва ц1ай ийир сиг1ыд вахтинди ки ва йизирик ки. Газ са сиг1ын диш халма, гьа йишийне алгара му1къбыр, джигьилер адылгара джуьхьды к1аъды ватанды. Ха1р хала сиг1ый, ха1р хизынди викий барышыхвалды», - гьухьур банымы ешемишды хьыдыние. Дагъыстанди кьуле выгыргара а газ ит1инид программа. Са сур сыдыд арыди газ йыгыр а 1,5 гьагъзырды хала. Шесты сыдыла гьа са на кьат1ыла хылис бала йиъи. «Хьылынды ц1ай лийкьара а лап хырыдад джигима республикади, гьа гвалах мидыла хъуъ ки лувза джывыъыр выгыргаси. Е эккене рази диъи джу Владимир Владимировиче ачых гьыъыны ц1инды объектбыр Дагъыстанди. Сиене дагъыстанабишды суруула гене ки сагъул ваъара президентес ва «Газпромас» джат1ур вылц1ад куьмгид бадана»,- гьухьур Федор Щукине. Хьели гьалгыр ай «Газпромад» кьухьды Алексей Миллер. Гьание гьухьур, гьатхы1д хьудды сыдыд арыди газ йыгыр ай 2 гьагъзырна 159-ды му1къа1. Гене, магьра1кат ади Владимир Путине балана гырга хьур газ к1аъды му1къма ад клубырма, гьание выр разивалды артухана йыхынис 1,2 млрд. манутбыр лешус газад оборудованиебыр. Лаъ гьыъыр бала маъ хьур кьиметбыр газад оборудованиедмыд на ва газ халыхда йыгынид.
Фото взято с сайта Главы РД

Б. МЫХАIДЫ