Дагъыстандид Минмолодежидид пресс-службадид хабардихьван, Махачкалди «Россия – моя история»-хьур таарихед парка выгыр ай Пабедадид Пайдах (Знамя Победы) лаъ выъынид церемония ВОВ-ди Гъалиб дишид 81 сен йишинис гюре. Мероприятие выгыд йиъи «Равнение на флаг»-хьур патриотический акциедид бадана, кьуле гыргара ад «Регион для молодых»-хьур федеральный программадид куьмгихьван.
Гьа церемонияди иштрак гьыъыр ай РФ-дид Ху1кийметед иджласад депутата Артем Бичаева, Дагъыстандид Правительствадид Седриед заместителе Муслим Телякавова, республикадид Минмолодежед кьухьние Камил Саидова, РД-дид кьылевыъынид ва гьы1лимдид министре Яхья Бучаева, Махачкалдид администрациедид къуллухчийше, ветеранаше, СВО-дид эскереше, кадетеше ва маддыбише.
Сахьусды дур ад мийманна йиъий специальный военный операциедид ветеран Айдемир Исмаилов – хыдыл йиъид Россиядид Йигитед Абдулхаким Исмаиловды, 1945-хьусды сыда джуды юлдашешихьван сыт1а Рейхстагды Знамя Победы сывхы1д. Гьадыла гьанийде лаъ ваъас выр ай пайдах. Пайдахад хъа1ред гьадхынвалды виъий 35 метри, ва пайдахад джуды ху1ляхвалды – 10 метри.
Муслим Телякавова гьухьур, Гъаалибва1лид Па1дах (Знамя Победы) ихьды халкьмыд йигитва1лид символ виъи, ва йик1ыы лихъедир да1гьвиди дыркьыд 27 млн. инсан, джуьхьды гьу1мир выр Ватан бадана ва ихьды гъийгъад валаетдид яшайиш бадана.
«Ми пайдахахьан е ешемиш диъи, гвалах ваъара а ва гъаалиб дуруъура а гъийгъа – ва да1гьвидики, ва мидики. Ми пайдах хана да1гьви выгыргара а ихьды эскереше СВО-дики, мидихьван е гъаалиб дишири 1999-хьусды сыда. Гьаса мидыла хъуъки е дуруъус. Йик1иыла утха мадаъ ихьды йигитер, чалыш диш гьабишик кидикарана ешемиш дикис ва гъаалиб дикис. Йиъине ад Гъаалибва1лид Йыгъ ва1с къутли йикихь,», — гьухьур гьание.

Б. МЫХАIДЫ