Дагъыстандид врио йиъид Кьухьные Федор Щукине Дербентский районди Мамедкала му1къа1, эккед гьугълумыра зиянбыр выд, гвалахбыр гине йыхьыдид ихтилатбыр гьыъыр.
Россиядид генеральный прокурорад заместителехьван Сергей Бажутовыхьан, республикадид премьер-министрехьван Магомед Рамазановыхьан ва мадды кьухьдыбишихьан сыт1а гакьыр тааныш йишир хьедбыр литхьуд кучимыхда, ва шууна кьуле гыргара ади гьа джигаабыр дюз-дюзгин хъаъара ад гвалахмыхьан ва ихтилатбыр гьыъыр ерлид гьади ешемишды инсанашихьан.
«Кабинета сиене ад агьвалат гьувгардиш, гьадыла гъийгъа е миди йыдкьыбырдиъи, гьац1ара гьаъас, хьур, шууна гъилы лахъахара ади ербыр миди юкьсура, шудаъ к1ыбди гыргара ади лазимды гвалахбыр. Ва сахьусды кьул ха1сил дикис, хьур, инсанашихьан, гьац1ын бадана гьабишды къавгъу-дердибыр, джетинвалдыбыр — гьилды джигиди е шывга йыхана джаъара ади, шыв ади камды-кесды ва йилды къавгъумыс е балана убур йыхы1р йыгарди», — гьухьур Федор Щукине.
Гьание гене гьухьур, федеральный центр ки мысга дерде а миди ад агьвалатад, инсанашды къавгъу-дердимыд. Россиядид Президенте Владимир Путине мысга хакьыр а джуду контроля сиене суалбыр кьуле йыгынид арыди-джаргыди хъыгара ад гвалахбыр эккед зиян-зарарбыр йишидыла хъуъ. Выъыр а правительствадид комиссия кедир ари сиене куьмег выс йикисды министерствабыр на ведомствабыр.
Республикадид врио кьухьнийды ч1елмыхьан, сахьусды гвалах бегьем виъи гьухьус йикиси — хьед хъа1а1тхы1р а. Гьамыъ кьуле гыргыр йыгад балад гвалахбыр а: хал-лахбыр луза гьыъын, тангабыр хъывын ва мадды суалбыр.
«Яхда ад ц1амды вахт виъи гьа сиене суалбыр кьуле гыргасды ва анийиъи мадды балад суалбыр, къавгъубырки гъийгъа е миди лаъ гет1ир агъмиш гьаъара ад. Гьамыд хабар е джурана ваъас — сиене гьакьасабырмыкла, хъывылц1ара ад тангымыд ва мадды суалбыр кьуле гыргад вахтмыд — инсанашис ва сиене Дагъыстанди ешемишдибишис», — гьухьур бегьем руъуди Федор Щукине.

Б. МЫХАIДЫ