Дагъыстанад Кьухьние Сергей Меликова сытIа выгыр ай иджлас Республикадид призывад комиссиядид ва РД-над Оперативный штабад, республикадид кьухьнийды пресс-службадид хабарахьан.
Беслемиш выъыр иджлас Сергей Меликова регионас выгад хабарарала — дагъыстанашурас Магомед Исбакиевас выр а, хьур, Россиядид Йигитед звание. ЙикIыы лихъийис, мисте гъыIнне валаетед президентехьан Владимир Путинехьан хаIсил йишид гедене гвардии майор Денис Диденкора ихтилат гьыъыр джуды даIгьвиди саджигиди ад хыдыере Магомед Исбакиевара выъыд подвигехьла ва хайиш гьыъыр хуIкиметед кьухьнийда вияъ, хьур, гьанийис Россиядид Йигитед звание.
Исбакиевды группадире выгыргара ай перегруппировка войскамыд Херсонский областе, са йыгъад на вышед арыди гьабише батмиш гьыъыр 20 бронетехника ва 200-ла балад боевикер. Дагъыстандады офицере, убур джыхыIр джуду яраллывалдымыс, группадид кьуле гине выгыргара марай даIгьви. Гьадис гюре йичIир кьуле выгыргас сивхьир ад везифе, джуды гьуIмир ки выр. Йигит кихьир а москвадид бегеде хад Мытищы-хьур шегьердид мемориальный сырымы.
Регионад Кьухьние ихтилат гьыъыр эскеред йигитваIликла ва йикIыы лихъийир, СВО каIчIуда хъуъ сахьусды Россиядид Йигит йишир Дагъыстандады инсан — Нурмагомед Гаджимагомедов.
«Дагъыстан агъаяна виъи джуды 13-ды духары — Россиядид Йигитешы. 45-хьусды гвардейский бригададид ВДВ-ди ад офицереше Денис Диденко кьуле гине хайиш гьыъыр президентеда вияъ, хьур, Россиядид Йигитвалды ихьды инсанас Магомед Исбакиевас — офицер-разведчикес Херсонский областе подвиг выъыд.Кьуле выгыргад вахтинди разведкадид везифе, гьание джуду гьуIмир выр гъаъ эхъепIир баласды группа. Ва Владимир Владимировиче гьа гедене гьухьур, гьа эккед лазимды гвалах виъи, джуьхьды хыдыед бадана хайиш гьаъади эскерваIляды дусташе, са джигиди даIгьвие дишид. Гьание гьухьур гене, чIел адишне гьа кьарар джу эгъетIес, хьур.
Ва гьамыъ гьа кьарар кьабыл гьыъыр а. Президентед Указахьван Магомедис выр а звание Российский Федерациедид ЙигитваIлид! Гьа генеки рухьуд чIел виъи, шууна ихьды валаетед президенте хыIваI хакьыд кар кьуле гыргарди специальный военный операциедид иштракчийшды бадана», — гьухьур Сергей Меликова.
Иджласа лаъ гетIид суалмык кий — призыв выгын республикадид инсанар армиди дыгыргасды. Выгыргара ад призывад кампание кувчIуд виъи октябрь вазыра ва бегьем викиси декабред ахирес. Армиди дыгыргасды йиъи джигьилер 2006-1994-хьусды сыдырма дуьхюд.
Сергей Меликова гьухьур, йыхана чалыш дишир йыгара кьуле йыгын бадана джуьхьды бырдж, гьагва гьыъыр ад президенте, ва оперативный штабырмыд везифемыра. Гьание генеки йыкIыы лихъийир, Дагъыстандады призывникер сидиргара а арми ливес РФ-дид Вооруженный Силама, Федеральный гвардиедид национальный службади ва Россиядид ФСБ-дид пограничникешды войскама.
Гьадыла хъуъ республикадид врио военный комиссара Абдурахман Мурадханова ихтилат гьыъыр гвалахакла ерлид призывад комиссиямыд.
Агьмиш гьыъыр суалбыр шууна йыхана ваъасди гьа гвалах республикадид шегьерма на районма.
Сивхьир ай везифе призывад кампание кьуле выгыргасна дюзгинне ва вахтинди.
Гьа суал гъанийиъи республикадид кьухьнийды контроля.
ЙикIыы лахъахара, призывникер сидигасды диш специальный военный операциеди иштрак гьаъас.
Б. МЫХАIДЫ
