Дагъыстан Республикадид Правительствадид Седри Абдулмуслим Абдулмуслимов МыхаIд районди йыркьыйне ерлид инсанашихьван ихтилатбыр, хуткун-суалбыр гьыъыр ай, гьабишды дердимыхда хъацур ай, хуткунбыр гьыъыр ай, районди шыв гвалахбыр сахьусды кьуле йыгыр йыгарди.
Меселла, ЦIудикды муIкъаIбишихьван республикадид премьер-министре ихтилатбыр гьыъыр ай бюджетед гвалахмыкла муниципалитедед къавгъубыр кьуле гыргад. Инсанаше правительствадид кьухьнийс агъмиш гьыъыр ай районди ад джетинды суалбыр: тукмыд, хьидмыд ва рыIкъмыд. Абдулмуслим Абдулмуслимова гьухьур – Дагъыстанад кьухьдыбыр чалыш диъи куьмег выс хаIр муниципалитетес ва бытIрана кьуле эдир, шууна хуIкиметед программамыра ягъаIд кал хаIр сыда рыхыIрди инсындис лазимды объектмыс тангабыр. Меселла. миди МыхаI хад хьед, ари кийир Амсар, Кала ва Куфа муIкъбыр ки районди ад, гьа объект ки кьуле гыргара ад йиъи республикадид инвестпрограммадихьван.
Джилихура муIкъаI ки инсанаше гюзет гьаъара ай правительствадид кьухьды. Миди Абдулмуслим Абдулмуслимовад бегеде йыркьыр Рашидин Касимов. СытIа дишид инсанашихьван гьание ихтилат гьыъыр республикадид кабминед кьухьнийс ад агьвалатакла Джилихур муIкъаI ва сиене МыхаIд районди. Сахьусды суалбыр – махкамана хьед не йаькв йыгын. ДжваIршис халыс инсанаше шешин ягъаIре адиший. Гьа арыди гьацIара йишир, Рашидинды хуIрмет увухуIд муIкъаI адбише. Гьанийды дух – иштракчи СВО-дид Касимов Худаверди Рашидинович шесды сыда йыхыIр йикIир. Йикьида хъуъ гьанийис выр ай Орден мужества.
Абдулмуслим Абдулмуслимова эккед сагъул-варулбыр гьыъыр Рашидинис йыхана хынхыс выд тербиедид бадана, ва са ки йыхана дерде а хьур инсанашды ерлид суалмыд на къавгъумыд.
Гьаса ерлид инсанашихьван хаIсил йишир Абдулмуслим Абдулмуслимов Шиназ муIкъаI йыркьыйне ки.
Муниципалитете йыркьыдаа хъуъ гьыъыр протокол кийир ари гыргасды гвалахбыр на джываб высды гьабыр вахтинди гьыъын бадана органбыр на кьухьдыбыр. Дживаб высды идарадис выр а кьуле гыргасды суал — хьед йыдкьынид гвалахбыр бегьем гьаъасды артухды 12,8 млн. манут гене йыхыIр йыгара хьур.
Дагъыстанад Минстроес выр а хьуланды поручениебыр: 180-ды еред мехьтеб Сыназыра ваъара ана лувзур адид суал кийин бадана Российский Федерациедид госпрограммадик; МыхаIд райондид администрациедыхьван сытIа гьацIара гьыъын зиянмыд кьадар выр ад водопроводмыс Шиназ, Нижний Катрух муIкъма ва «Мюхрекский» сельсоветек кид муIкъма. Мюхрек, Цудик ва Джилихура махкамды хьед йыгын бадана, гьазыр гьыъыр проект сигыр йыгара республикади, тангабыр водопроводас йыхыIн бадана йыкьасды сыда.
РД-над Минэнергодис выр а поручение кьуле гыргасды «Рутул-Лучек» линиеды гъад тукад синмыд на усмыд агьвалатад суал, трансформаторбыр, подстанциебыр дюз-дюзгин хъыъыр кьалба-усла хъыгыр йыгад сиене джигима, тукад усуд опорабыр дегиш гьыъын, ва са ки «Газопровод Ахты – Хрюг – Рутул, Рутульский район» и «Подводящий газопровод к с. Тпиг, Агульский район» хьур объектбыр кьуле йыгынид.
Дагъыстанад транспортад рыIкъмыд хозяйствамыд Министерствадиде бегьем гьаъ хьур а гьацIара гьыъын гьили шудаъ, шууна машинмыд раIхъмыс зиян-зарарбыр выр ади гьугълумыра, гьадыла саваенди, гъыIмыд агьвалат ки МыхаIд районди ад вацIара ваъ хьури гьабыр дюз хъыъын бадана. Гьадыла саваенди кIыбка ачых гьаъ хьур а инсанашис раIхъбыр «Мамраш – Ташкапур – Араканский мост» км 78+800 и «Подъезд от а/д Мамраш – Ташкапур – Араканский мост к с. Дулдуг» хьур схемадихьван.
НацIурмыд гийбхьуд джигима дамбабыр гьаъ хьур поручениебыр выр а Республика Дагъыстанад природный ресурсмыд ва экологиядид Министерствадис.
РД-над кьылебыр гьыъынид министерствадиде Агъулад ва МыхаIд администрациемыхьван сытIа агъмиш гьаъ хьур суал, шууна игъийисды мехьтебырмыс нинды чIилды китабыр.
Б. МЫХАIДЫ
