Дагъыстанад халкьмыд саваIлид Йыгъ агъмиш гьаъад йиъи хаIр сыда 15 сентябрес. МКОУ «Куфинская СОШ», хьур, мехьтебе гьадис гюре кваIчIур ай шумудъиди мероприятиебыр, лаъ-хьуъ гьаъасды хынимешды ватан хъывгынвалды, таIрих ва гьадатбыр Дагъыстанад ухуIсды, ва са ки гъигъе, гуджли ваъасды халкьмыд савалды.
Сахьусды этапас выгыр ай 3-6 классма ад телебийшис экскурсия дыгыр гьабыр Гуфадад культурадид отделед центра.
«Ихьды экскурсия выгынид себеб виъий тааныш дыъын хынимер мыхаIбишды эккед таарихехьван на культурадихьван, Дагъыстана ад лап эвелды халкьдид», — гьухьур МКОУ «Куфинская СОШ»-дид директора Юсуф Таджидиновиче. «Ес йыгара, ихьды телебийшис гьацIыр Дагъыстана ад балад миллетмыд таарих ва кьимет выс йикисне гьабишда ихьды балад культурамыд варлываIлис, кIалыб гыргад ихьды республикадыы гьилине адишды».
Экскурсияди хынимер тааныш дишир мыхаIбишды халма ад эвелды кардымыхьван, хьурагине атабабыйше гьаъад гвалахмыхьван, эвелды гьадат-нубатмыхьван. Эккене убур йыхыIр ай мыхаIд нинды чIилис не мыхаIбишды китабырмыс. Хынимер убур хъихьир бытIрана хъадабцура ай ихтилатмыхда, мыхаIбишды дур-ун ад шаирешикла гьаъара ад ва мадды культуради дур сатыд инсанашикла.
«Е чалыш дуруъура а Дагъыстанад халкьмыд саваIлид Йыгъас гюре агъмиш гьаъад мероприятиябыр кьаIаIрдыбыр джикисне, гьекъикъат гьамыра хынимешис гьацIара гьаъас, хьур балад джацIад карбыр», — хъухьур гене ки Юсуф Таджидиновиче. «Ес йыгара, гьабыр гедкьыр, джваIр ки са Дагъыстанад эккед хизындик кидбыр диъид».
Экскурсиядыла гъайри Куфинский национальный ва традиционный культурадид центра выгыд Дагъыстанад халкьмыд саваIлид Йыгъас гюре гене гыргасды йиъи хьуланды гвалахбыр МКОУ «Куфинская СОШ» мехьтебе:
— Шикилмыд конкурс «Изды Дагъыстан», хьур. Хынимешда йикиси йыхыIс шикилбыр хаIрса джура джваIр гедыркьад ка Дагъыстанад миллитмыд саваIлихьде.
— Литературный вечер «Дагъыстан — изды Ватан», хьур.
Гьади телебийшда йикиси кьыле гьаъас Дагъыстанаклады шиъирбыр, ад республикади ихьды шаирешды уфтанды китабырмыкла, выс гьамыс кьимет.
— Тематический дарс «Символы Дагестана», хьур.
Гьа дарса гьабишис гьацIара гьаъас Дагъыстанад символмыд — пайдахад, гимнадид ва гербад таарих.
— Викторина викиси «ВацIарама вас Дагъыстан?», хьур («Знаешь ли ты Дагестан?»).
Сиене гвалахбыр гыргасды йиъи дарсымыд программамыра ягъаIд кал, гюзет гьаъара хынимешды еш.
Б. МЫХАIДЫ
