Дагъыстанад Сулейман-Стальский района выгыр ай выездной иджлас Дагъыстан Республикадид Халкьдид Маджлисед Президиумад, республикадид агропромышленный комплекс (АПК) шууна йыха гьыъынид бадана инвестициебыр йыдкьыр региона. Гьа эккед иджлас, ягъмиш дыъыд дур-ун ад хуIкиметед кьухьдыбыр, бизнес инсанар, экспертер выгынид себеб виъий кюмег выс хьур аграрный секторас ва бегемиш ваъас гъараа республикади йикьас йыгад инвестициямыс.
Иджласа адбишик кине гьади иштрак гьыъыр ай МыхаIд райондид кьухьние Сулейманов Давуд Амаевиче ки. Гьанийды иштракваIлире ва мадды районмыд кьухьдыбишды гьанийхьван сытIа гьа иджласа, гьагва гьаъарай эккене лазим йиъивалды гьа гвалахмыд Дагъыстандид сиене муниципалитетмыс, ва гьазырвалды хыл-хыле выр гвалахбыр гьаъас регионад кьухьдибишихьванна ва Халкьдид Маджлисехьван аграрный сектор лаъ-хьуъ выгын бадана. Иджлас выгыргара ай Дагъыстанад Халкьдид Маджлисед седрие Заур Аскендерова, мысга джуды хылихьде лебшуд сахьусды лазимды суалмыд агъмишвалдыбыр.
Гьади иштрак гьыъыд кьухьдыбише ва республикадид парламентед депутаташе, йыхана къарарбыр гьацIад ва балана гвалахад опыт ад, агъмиш гьыъыр сиене суалбыр къарармыра ягъаIдкал, ва шууна гьабыр кьуле гыргасдыкал мидыла хъуъ.
Профильный министерствамыд ва ведомствамыд куллухчийше, джываб вылцIад АПК-дид гвалахмыд суруула, лазимды кьимет выр агъмиш гьаъад суалмыс, рухьура, шыв гьыъыр йыгарди агьвалат йыха вишин бадана. Гьабишды гьацIалмыра сельский хозяйствадид сураа, шыв тангабыр йыгаарди ва шууна гвалахбыр арыди-джаргыди йыгыр йыгад иди кюмег вылцIара кьабыл гьаъас кьуле йыкьасды ва хайир высды планбыр.
Муниципалитетмыд кьухьдыбише, гьабишик кине МыхаIд райондид кьухьние ки, хьуъ гетIир ай джуьхьды районмыд инсанашды гьакьасабыр ва выр кьимет агъмиш гьыъыд суалбыр кьуле гыргасды гвалахмыс. Гьамыра гюзет гьаъара ерлид гьакьасабыр на лазимды хаIр ераа гвалахбыр.
Бизнес-сообществадид инсанаше, джуьхьды суруула, вылцIара кьимет гьади хьуъ гелъед проектмыс, гьамыла шыв хайир йикисды, гьацIара гьаъара инвестициямыд джетинды гьакьасабыр ва рухьура шууна дюзне лаъ-хьуъ выгыргасды АПК. Бизнесед инсанашды иштракваIлире кюмег вылцIара инвестициябыр республикади йыкьасды гвалахмыс ва инсанашис гвалахмыд ербыр бала гьаъас.
Сахьусды везифе выездной иджласад — кьабыл гьыъын мидыла хьуъ балад вахтинди лаъ выгын АПК, хыIваI лешур сиене гьа гвалахмыд дерде адбишды ниятбыр. Агъмиш гьаъара ад суалмык кини йиъий балад гьакьасабыр — инвестициябыр гьагун цIинды технологиямыс ва мадды лазимды технологиябыр гьагун яшайиш муIкъма йыха гьаъасды, куьмег высды ерлид замхаIкешешис. Балад убур йыхыIр ай кIаъды бизнесес АПК-ди ад.
Гьади выгыд гвалахара гьацIара гьыъыр мидыла хъуъ лихьир йыгад гвалахмыд къадамбыр балад вахтинди кьуле йыгыр йыгад гьакьасабырмыд, гьамыхьван сытIа гьазыр гьыъын лазимды программабыр, шууна йыкьасды федеральный ва республиканский тангабыр ва шыв гьыъыр йыгарди хайир высды куьмег сельхозпроизводителешис. Иджласад кьарарбыр китхьуси хуIкиметед программамык, йыха ваъасды Дагъыстанад аграрный сектор. Дюзгинне кьуле йыгыйне кьабыл гьыъыр ад ми иджласа планмыра куьмег выси лаъ гьаъас республикадид экономика ва гьадихьван сытIа инсанашды яшайиш ки. Генеки гьухьус йыгара, балад убур йыхыIр ай цIинды гвалахмыд ермыс ва лаъ-хьуъ йыгынис муIкъма ад ерлид накьумыд гвалахбыр. Са чIилихьван, гьухьус йикиси гьа иджлас виъи лихьир ад лаазимды къадам йыха ваъас, хьур, гьамыъды аграрный сектор Дагъыстана.
Б. МЫХАIДЫ
