Мисте 80-сен йиъи йе Гъалиб дишид 1941-1945 сыдырмыд даIгьвие. Гьадис гюре йе гьаъаси ихтилатбыр сагъна мадад ва ехьван мадишды Дагъыстандид Йигитешикла.
Ес каIчIус йигара сахьусды Ибрагим-Паша Садыковакла шесды сыда Россиядид Йигит звание выд.
Ибрагим-Паша гьухуд йиъи 12-хьусды январес 1924-хьусды сыда МыхаIд районди, МыхаI муIкъаI.
Джуды йикIа лувзур январь вазыра 1942 сыда йыхьыд йиъи даIгьвие. Гьание иштрак гьыъыр ай Сталинградский битвади, сада бомбежкадыхьде гирхьур гъил йыхыIр яраллы йишид и. ЙыхыIн хъишидыла хъуъ гьа сигыр ай Крымди. КваIдхьусды хылис йишири гьад яраллы Керчди.
Йыха хъишийне хъиркьыри гьа Дагъыстанди. Миди давам джыъыр маа даIгьвие хъаIрхыIри. Гьади гьа ирхьури Тулади ад танкмыд часте, гьада йыхьыд йиъи гьа Курский дугади. Курскадыла гъайри гьа йишири Киевди, Львовди, Западный Украинади ва Варшавади. 1945-хьусды сыда гьа мадды Советский Союзад къушуммыхьван ари кине ани йиъий Германиеди.
Сада немецешды окопа атака гьаъади, гьание гевири пулеметный точка, ари йыхыIр тикетке дыъыри шумур иди душман, выдж яраллы йиъине.
Ихьдыбыр гъалиб дишир ад Ибрагим-Пашес гьацIыри Новосибирскади. Гьанийхда ани йиъи орденбыр Славы II ва III степенмыд, медальбыр «За отвагу». «За освобождение Варшавы», «За победу над Германией», Жуковды медаль ва мадды наградабыр.
БисаIли Ибрагим-Паша ешемиш руъура а Махачкалди.
Гьанийды хыдылара Керим Махмудова гьуIмир выри СВО-ди иштрак гьаъара. Гьа ки джуды дедий ка 80 сен хьура гине йикIа лувзур йыхьыд йиъи даIгьвие.

Б. МыхаIды