2 сентябрес кьылевыъынмыд идарама МыхаIд районди байрамад шадды атмосфера ай, гюзет гьаъара шивди йыхды ва шадды карбыр йикис хьур. Торжественный линейкабыр, деринды чIелбыр, гъигъды яIхъбыр сахьусды класса дуруъура ад хынимешды — гьамыра сиъинмыра гьацIара руъураай гьа йыгъа хынимер мехьтебе хъуIдире ад.
Гьа йыгъа эккед убур выр ай Йирекдыбишды мехьтебес, йисхьурди гьади йыркьыр ай МыхаIд райондид кьухьды Сулейманов Давуд Амаевич.
Джуьс чIел выдаа, гьание сиъинбишис къутли гьыъыр мехьтебе хъуIдид байрамад Йыгъ, йикIыы лихъийир, кьыле выъын бала лазимды гвалах виъид хаIр са инсындид гьуIмирди. Гьание гене гьухьур, мехьтеб кьаIаIрды ер диш, дарсбыр хаIр гьаъад, миди инсындикла гьекъийкъатды эдеми гьаъад джигаа йиъи, гьанийды фикирбыр дюзды рыкъаI ахад ер виъи ва гьекъийкъатды валаетдид гражданин гьаъад джига йиъид.
Давуд Амаевиче хуткунбыр гьыъыр, шыв ади ва адишди мехьтебе лазим йиъидкал дарсбыр гыргас йишин бадана ва телебийшис къисмат гьыъыр йыхана кьыле ваъас.
МагьаIлимешды гвалахас кьимет выр эккед хынимешис вылцIад тербиедид сураа.
Джуду суруула мехьтебед директора Булбулов Фейзуллаха сагъул-варулбыр гьыъыр райондид кьухьнийс рыхыIре ад мехьтебес хыл-худад бадана, кюмгид бадана. Гьание гьухьур, мехьтеб мысга гьазыр виъи администрациедихьван сытIа гвалах йыха ваъас ва кьуле гыргас сиене программабыр кьылевыъын хинимешды лаъ-хьуъ вишин бадана.
Гьа йыгъа Йирекдибишды мехьтебе гьекъийкъатды байрам ай. Гьа гьунар йиъий сиъинбишды чалышваIлид — райондид кьухьнийды, телебийшды ва магьаIлимешды.
Райондид кьухьние, руъура мысга мехьтебырма, эккед убур рыхыIре райондид кьылевыъынмыд суалмыс. Гъийгъа гьание миди хинимешис выд угутмыра — кьыле выъын бала лазимды кар ид хаIр са инсанас — хынимешис йыхды дарс йиъи кагъуIре ад кьылевыъынид цIинды сыда.

Б.МЫХАIДЫ