Гъийгъа ихьды хуIкиметере выгыргара а СВО Украинадид ерымы — гьабыр таарихди сифте Россиядид ербыр йиъий. Гьамыъ ки гьади ад инсанар баласты диъи урус миллитдикладыбыр, ва гьабыр балад сенбыр и джуды чIел, таарих ва кихьин-каагъун бадана украинский националистеши хьван даIгьви ваъад Донбасди (Донецкди ва Луганскди, Харковди ва Херсонди).
2022-ды сыда ихьды хуIкимет Россия маджбыр вишири миди специальный военный операцие выгыргара кувчIус, гьис хьурди миди НАТО-дире сытIа дыъыр ай балад къушунбыр, цIинды ярахбыр ки выр, эскерер ва боевикер хаIр даъад лагербыр сихьир. Гьадыла саваенди, миди сихьир ай гъигъды биологический лабораториябыр ки.
Дуьнйадид гьакь-гьасаб гьагуд гедене, инсанар ки ихьды хуIкимете ад людзир, дуруъура качIури СВО-ди, ихьды эскерешихьван сытIа неонацистер ва террористер къирмиш даъара. Ми йигит духрешды арыди кинидиъи мисед къуччахар ки сиене Дагъыстандид районмады. Гьабишды арыди кини йиъи джуды найитдыхьван СВО-ди йыхьыд Гьахтыбишды Зрых муIкъаIды Сафидин Рагимов.
Минийды рихьцIырна кьваIд сен йиъий, 2022-ды февраль вазыра ихьды эскерешды специальный военный операцие кувчIуд гедене. Пенсионерес ишид гедене ад агьвалатакла, лузур руъура Гьахди военный комиссариата, кивильхьере гьаIрзе джуды нийатдихьван руъус, хьур, СВО-ди. РыхьаI хылис, хъаIхъджечIур, ми генеки руъура райондид военкIумахда. Гьадыла хъуъ руъура Махачкалди ад военкоматмы, хьели – Дагъыстан республикадид военкомата. Минийис вылцIар диш ихтияр руъус даIгьвие… Гьадыла хъуъ, вахт гьабхыIйне ка, минийихда са йыгъа сес ваъара Гьахтибишды райондид администрацияди, ва гьади минийис теклиф гьаъара каIчIус Дагъыстанди сытIа гьаъад «Каспий» хьур дур гъад джуьхьды нийатдихьван сытIа дишидбишды батальона. 2023-ды сыдыд январед хьура хъуъ йиъид йыгъырма Сафидин Рагимов лийкьыр йигитешды къушинмыд арыди, гьадыла хъуъ каIчIури душманашихьванды даIгьвиди иштрак гьаъара.
Миние, СВО-ди йыхьыд гедене, джус лювшур а эскерешды лакьаб (позывной) «Киче» хьур. Джуда за хуткуд гедене мидид натыдже, ватан увурхаIд йигитере гьухьури — зы йиъи Зирыгъды муIкъа1ды, изды дид-нин, хизан миди лезгиешды ераа адбыр диъи. Амани изды тухумдид гъваб (корень) виъи мыхаIбишды Хьичед муIкъа1ды. Гьадыла захда мисед хийал йишири – изды ата-бабыйшды накьудид дур зас лешус хьур эскерешды лакьаб не – «Киче». Ихьды ватан Дагъыстанди ад сиенебыр шуьбаI диъи, ва ихьды арыди гьеч ад диш суал — выш гьилды миллитдиклады йиъиди!
СВО-дид иштракчи С. Рагимовад гьуIмирди генеки йишир ай къисмат кьвуIнды боевой операциеди эскерешды приказбыр кьуле гыргас.
1980-ды сыда гьанийыхда срочный призыва сес выъъыр армиди, гьадаа ми сиргара Афганистанди – гьади Советский Союзара выгыргара ай эскерешды операцие миди ад душманашихьван. Гьабыр гьади хаIр даъара ай западный инструктораше СССР-ес душманвалды ваъас хьур. Ми даIгьвиди джегьил гада кьуIне йишири контужен, духтураше комиссоват гьыъыд гедене, справкабыр гиркIа гьыъыр, маа хъугъуIре Афганистанди… Джу гьувга выъыд векIегьваIлис минийис вылцIара хьиб боевой награда: Ирды ХаIдийед орден (орден Красной Звезды), медальбыр «За боевые заслуги» ва «За отвагу».
1999-ды сыда Дагъыстана аа-уу дуьнйадыла йитIкьыр террористеше гьуджум гьыъыд гедене, Сафидин Рагимов, сытIа Махачкалди ад «афганский» даIгьвидид ветеранашихьван руъура халкьдид ополченец не ЦIумадинский районди душманашис отпор выс хьур. Гьади 60 ветеран-«афганцер» цIугьуч1ды йыгъа людзуьр, гуьзет гьаъара, гьаIзыр дишир: мыс россиядид армидид кьухьдыбише высди приказ, ярах выр, террористер руг даъ хьур!
Гьади Россиядид армиедире боевикер пыч дыъыр, йихъидгыд гедене, ополченец джуды юлдашешихьван хъуIгъуIре меркезди. Миди ки ми даIгьви бегьем вуруъума, Сафидине ва джуды эскер-дусташе гыргара къарывыл шегьерди мертебебыр ад халмыд, гьис хьурди, боевикеше ми ветеранашис ополчениеди дыхьыр хьур гичI ливед хабар сивигыр ай джухьды халбыр тIутIкьа гьаъас хьур.
Гъийгъа ки ихьды йигит дух Сафидин шу, ата-бабыешды «Киче» дур-лакьаб ки хана, джуды ниятдихьван йыхьыр, Дагъыстандид «Каспий» дур гъад йигит добровольцешды батальонад арыди махкамна лузур а СВО-ди, бандеровцер, неофашистер ва наемникер пыч даъара.
Миди гьание маа ки джуды выгIылвалды ва эркеквалды гьувга ваъара а. Яралы ки йишири, сылды контузие ки вишири. Джуьхьды «Каспий» батальонад командиреше зенг гьыъыр далгад гедене, минийды зурбаваIлид хабарбыр гьацIара гьыъыр а Дагъыстан Республикадид Кьухьды Сергей Меликовас. Гьадыла ДР-дид Кьухьнийды сураа «Киче» лакьаб гьад йигитес выр а Благодарность. Мисед сагъулбыр гьаъад документбыр ани йиъи эскерешды кьухьдыбишды сураа аки.
Гьамыъ ихьды йигит отпускади а, джуды яраалы йишид йыIхыIнмыс давабыр гьаъара. Зас гьагур СВО-дид йигит «Киче» Хьичед муIкъа1 – джуды бейдебишды дух срочный службадаа хала хъиркьыр а хьур. Миди Сафидин Рагимова гене ки гьухьури: «Зы лезгийшды муIкъаIаIды йиъи, аммани изды ата-бабыер мыхаIбишды муIкъаIаIдыбыр диъи. Йе, дагъыстандибыр, сиенебыр диъи са миллет, са худ кал сытIа мысга ки душманас джываб вылцIад. Гъийгъа йе сиенебыр диъи са Ватандид, са ихьды хуIкимет Россиядид армиедид эскерер! Изды бедендид эбир гывгъаIдыйкьама, са ук1 ки мабадыйкьама за изды нинабыр, ришиймар, хынимер – изды Ватан увуIхуIсы душманада! Гъаалибвалды ки викиси ихьды Россиядид армиедид !
Сафидин Рагимов калды йигит гъа ихьды ата-бабыйшды накьуды, ва гьасад йикIик кьел кид духре диъи сиене ихьды СВО-ди ад эскерер. «Киче» калды Ватан увуIрху1быр диъи ихьды умуд ва пайдах!
Аллагьара джваIр удухуIй!
Къинады САИД
