Махачкалди вишир ай Дагъыстандид Правительствадид маджлис Дагъыстан Республикадид Правительствадид седри Магомед Рамазанов кьуле гине.
Заседаниеди сахьусды хьуъ гет1ир ай кьуле йыгынид суал «Летний оздоровительный кампания в 2026 году». Магомед Рамазановды ч1елмыхьан гьемисагьа1тди ки мадад ЧС-ед агьвалатахда гаджадкьы1р, дагъыстандид кабминере кьуле выгыргара а фуланды кампаниедид гвалах, мида 5-хьусды июняла ка1ч1ур 30-хьусды августайкьама викисды.
Дагъыстандид Премьер-министре тапширмиш гьыьыри генеки хъац1ара хъаъ, хьур, тихылисне йишид гьугьлумыла хъуъ шыв усла ади хынимешды лагерьбыр. Гьадыла саваенди гьание хайиш гьыъыри, быт1рана убур йыха1ъ, хьур, касиб хизанмады хынимешис.
«Путевкабыр гадкъы1р кал пай гьыъыр йигара, СВО-дид иштракчийшды хизанмады хынимешис, правоохранительный органма гвалах ваъара адбишды хынимешис, джетинвале ы1тхы1д хизанмады хынимешис ва тирдже лугъуд гьугьлара хал-лах хьидире йихир, зиян-зарарбыр йишид хизанмады хынимешис ситхьун бадана путевкабыр. Едед хынимешис ки быт1рана убур йыхы1р йигара», — гьухьури гьание.
Гьадыла лагерьма ари ягъа1д кал условиебыр гьыъыр йигара, сиене хынимешда йишин бадана гьадиъ дыкьас.
Магомед Рамазанова генеки тапширмиш гьыъыри макъыет диш, хьур, темизвалды увуху1ны сиене гвалах ваъасды лагерьма ари ва квалификациедихда гадкъы1р кет1е даъ магъа1лимер, духтурар, вожатыер ва маддыбыр, хынимешихьан гвалах ваьасды.

Зарема Исрафилова