Фёдор Щукин ха1сил йишир Абуталимов Темирланыхьан, Российский Федерациедид Йигитехьван, «Время Героев»-хьур президентский программа лапIт1уд, гьатхы1д сыдыд сентябрь вазырыла хъуъ регионад национальный политикадид министрвалды ваъара ад.
Кьва1р далгади лаъ гет1ир ай суал шууна кьуле выгырди президентский программа, шунна ха1р гьыъырди кьухьвалды выъынид гвалахбыр, гьадыла саваенди агъмиш гьыъыр лазимды суалбыр гъийгъа ихьды региона кьуле гыргара ад.
Фёдор Щукин эккене рази йиъий Россиядид Йигитала, йирзир гьанийды гвалахбыр, мидийкьама гьыъыр ад: «Е телевизора гадкьа1ди бала бегемиш йишири вы шууна ха1сил йиширди Владимир Владимирович Путинехьван ва гьувгур ай ху1кийметед кьухьнийды разивалды. Е сиенебыр выды гвалахмы шад-гуямиш диъи — ва гьабыр уфтанна кьуле йыгыри, вы — сахьусды йиъи».
Темирлан Абуталимова сагъул-варулбыр гьыъыр гьыъыд куьмгид, йывхы1д хыл-худад бадана: «Эккед сагъул! Ихьды дуруу президенте балад йыхды ч1елбыр гьыъыр, баласды Дагъыстандид дуруу. Гьа кар гьекъийкъад балана хушды йиъи. Гьадыла саваенди гьугълумыд суалбыр ки йик1ыы лихъийир, умуд выъыр республикадид ц1инды кьухьдыбишы ва гьац1ара, хьур, гьа гвалахмы выхьды гудж гъибхьусды. Зада хайиш гьыъыр ай лягъу1д куьмег ва1с йишидыхъунды вияъ, хьур, лазим йишийне».
Темирлан Абуталимова ихтилат гьыъыр джуды кьылевыъыникла, гьухьур, дарсбыр гыргара ай валаетди дур-ун ад инсанаше — Сергей Лаврова, Михаил Мишустине, Владимир Мединскийере, мадды федеральный министреше ва приграничный регионмыд кьухьдыбише. Программа кьуле выгыргара ад вахтинди гьадид иштракчиер дыгыр ай Северный полюса, Курильский островмы ва Сахалинди.
Фёдор Щукине джуду суруула гьухьур, дарсбыр на еринды гьаъадад гвалахбыр сыт1а йыгыйне, йыхана ва к1ыбды ха1р дуруъура кьухьва1лид гвалахмыс, ва сагъулбыр гьыъыр Россиядид Йигитес ваъара ад гвалахад бадана.

Б. МЫХАIДЫ