Дагъыстанабишды йигитеше бала йыхана иштрак гьаъара а специальный военный операциеди Украинади гыргара ад. Ихьды баласды гадийше даIгьвиди джваIр лап дирибашене гьадгва даъара, гьаъара эккед подвигбыр. Гьадис гюре гьабишис вылцIара а эккед наградабыр: орденбыр, медальбыр, Йигитешды хаIдийбыр. Дагъыстанад Кьухьнийды дуруу, дидис-нинис сихъиргара а командованиедире кагъатбыр, эккене дирзере ад ихьды гадиер, сагъул-варулбыр кид, гьабишис выр ад йыхды тербиедид бадана.
Амма писды хабарбыр ки кам руъурдиш – йыхды-йыхды джигьил духрешды, дыркьыр даIгьвиди, пыч вуруъура гьуIмир, ватан бадана, хизан бадана ва бегедебыр бадана хардж выъыр. Гьелбетдики, гьабишды дурубыр, йигитвалдыбыр мысга йикIыы гъана, фикирма ана адгаси ихьды россиянашды на дагъыстанабишды. Гьадис гюре Йигитешды дурубыр сырхаIре а ВУЗмы, мехьтебырмы, хынимешды садикмы, культурадид идарамы, кучемы муIкъма ад на шегьерма ад.
Ва гъийгъа ки, 2-хьусды сентябрес, Каспийскади 16-хьусды гимназиеди, Магомедали Магомеджановад дур выр ад, йыгыр ай кьылевыъынмыд Йыгъад байрамад линейка Дагъыстанад на Россиядид пайдахбыр ки китIир ва гимныбыр кыхыIр. ЙикIыы лахъахара ихьды газет кьыле гьаъад юлдашешис, Магомедали Магомеджанов ихьды МыхаIд райондады йиъи, Хлют муIкъаIды.
Республикадид Кьухьние Сергей Меликова Йигитед ихтилат гьаъади мисе гьухьур: «Эскер Магомедали Магомеджанов гьухуд йиъи 1967 сыда МыхаIд районди Дагъыстана. 1994-хьусды сыда хъыгыр ай Каспийский флотилияди ва иштрак гьыъыр терроризмадихьван выгыд даIгьвима Северный Кавказа на ва Дагъыстана. Гьадыла хъуъ йишири Сирияди вишид даIгьвие. СВО-ди гьа йиъий Южный военный округад 18-хьусды общевойсковой армиеди командующиед заместитель. ГьархыIр дуьнйадыла 14-хьусды февралес 2024 сыда яраллы йишир даIгьвие…»
ЦIинды мехьтеб ачых ваъади иштрак гьыъыр ай Дагъыстан Республикадид Правительствадид Седрие Абдулмуслим Абдулмуслимова ки. Мехьтеб выъыр ад виъи нацпроектахьван «Образование» 1224 хынхыс. ЦIинды юкьуд этаж ад мехьтебе гьыъыр а сиене условиебыр хынимер хаIр даъас: гьамыъды 63 дарсымыд класс, эккед столовый, библиотека, спортад ва иджласмыд залбыр, спортплощадкабыр, 4 лифт ва мадды балад карбыр.
Ачых ваъади гимназие, Абдулмуслим Абдулмуслимова гьыъыр къутливалдыбыр Дагъыстанад Кьухьнийды Сергей Меликовад дуруула. Хьели гьухьур:
«ГьацIара, цIинды мехьтебе йикисды цIинды идеябыр, телебийше йыхана кьыле ваъасды ва магьаIлимеше гьабишикла ватан хъывгад инсанар даъасды… 2024 сен гьыъыр а Россияди хизындид Сен. Ва мехьтеб виъи гьасад ер, гьили хынхыс гьацIара руъуд выдж ки кид Валаетед хизындик. Къисмат гьаъас йыгара, миди ад масалмыс ун хъыIхыIй йыхды чIелмыд, ихьды магьаIлимеше мысга йыхана гвалах ваъара, инамиш дикий джуьхьды телебийшы ва ихьды хынимер ки, кьаIчивалды джавацIыр, йыхана кьыле ваъас чалыш диший», — гьухьур республикадид премьер-министре.
Гимназие ачых ваъади иштрак гьыъыр ай Йигитед къариере Муслимат Магомеджановара. Сагъул-варулбыр гьаъади гьание мисе гьухьур: «Сагъул республикадид кьухьдыбишис, сиене иштракчийшис мехьтебес выгIлид дур сырхаIди. Телебийшис къисмат виший йыхды бахт…», — гьухьур гьание.
ВыгIыл йикIыы хъыгади, Муслимат Шахпазовнара гьухьур, Магомедали Магомеджанов хала хъиъиди командировкама мысга бичIимыд тIыч хана хъуIгъуIрей. Хала гьа гюзет гьаъарай къриере не кьвунды рышере.
«…За 33-ды сыда мысга гьа гюзет гьаъара ай командировкама», — ихтилат гьыъыр Россиядид Йигитед къариере.
Б.МЫХАIДЫ
