Каспийск шегьердид больницади гвалаха дыъыр а cпециальный военный операциеди иштрак гьаъабишды бегедед 17 инсан.
Каспийск шегьердид больницадире вылцIад кюмгила гъайри специальный военный операциедид иштракчийшис, гьабишды хизынмыд инсанар гвалаха ки кьабыл дыъыр а. ХаIр гьасад гвалах выгад инсанад суал лазим йиъидкал кьуле гыргара эгер ер ана йишийне халкьдид организациемыхьван, эскерешихьван сытIа меслягьаIтбыр гьыъыр.
«Ми гвалахмыхьван сытIа, е чалыш дуруъура даIгьвида яраллы дишир хъидкьыбыр гъилы лехъедыныла саваенди, инсан хаIр хъаъара даIви-къал адишды яшайишехьван, ва гьадыла саваенди гьабишды бегедебишис кюмег вылцIара гвалахмы аIчIус, сахьусды кьул, эгер хизан джетинваIли ана вишийне. Баласды вахтинды инсындире Ватан бадана даIгьвие иштрак гьаъади яки яраллы йишийне, хизындид йыкьаIаI руъура артухды джетинвалдыбыр. Е мысга гьазыр диъи кюмег выс, хыл-худ йывхыIс: Каспийск шегьердид больницадире ихьды защитникешис шумаиди сигыр ай гуманитарный кюмгимыд машинбыр, е мысга макъыет диъи СВО-дид иштракчийшды хизынмы, шад диъи, гьамыъ сададбише ехьван сытIа гвалах ваъара а, хьур», — гьухьури больницади гвалах ваъабише.
Больницадид пресс-службадире гьухьур, СВО-дид иштракчийшис ва гьабишды хизынмыс кюмегбыр вынид суалмыс эккене убур рыхыIре а Дагъыстанад Минздравад кьухьдыбише не республикадид кьухьдыбише.

Б. МЫХАIДЫ