Гъийгъа, 8-хьусды мартад йыгъа, «МыхаIбишды цIинды хабарбыр» газетед баш редактор Тимур Махмудов ха1сил йишир ай специальный военный операцияди иштрак гьаъара ад йигит Курбанов Мурад Айвазовичды ришиймашихьван. Гьание Этномедиахолдинг «Дагестан»-хьур идарадид кьухьнийды Арсен Юсуповды, Дагъыстандид Халкьдид Маджлисед депутатад Шамиль Омаровды ва джуду суруула гъийгъад 8-хьусды мартад йыгъад байрам къутли выъыри гьабишис. Тимур Махмудова Махачкалдаа мидиъ лийкьа хъыъыр, сигыр ад Этномедиахолдингад кьухьние Арсен Юсупова подарокбыр ва вручать гьыъыри ришиймашис редакциедид къуллухчийшды коллективед арыди.
Тимура гухьури:
— Ки кьул, гьемисе ма1рифатад услахьван байрам агъмиш ваъас Дагъыстандид изданиема гвалах ваъара ад СВО-дид иштракчийшды ришиймашис, нинабабашис йик1ыы гъани йиъий Арсен Юсуповыс. Амма гьа йыхды гвалах джу кьуле выгыргас хьур хыва1 лешури Дагъыстанад Халкьдид Маджлисед депутат Шамиль Омарова, гьание эккед кюмег выри тангыдид сураа холдингас. Гьадыла сиене гвалахбыр лазим йиъид ка кьуле гыргас раха1т йишири.
Арсен Юсупова, джу выгыргара ад журналистешды иджласа гьалгад гедене, гьухьур ай мисе:
— СВО-ди иштрак гьаъара ад эскерешды гуьгьуьл лаъ гыргыныд сураа балад кюмег вылцIара хьылеше. Духрешды, шубешды фикирдире йик1ире йик1 улере анахъун ки, хьылеше бала сабырвалды ваъара а, гьис хьурди гьабишис гьац1ара а, ихьды йигитеше душманад улихьде йы1кь аа джырыхы1ре ад. Ха1р СВО-дид иштракчиес, джуды хал, хизан йик1ыы гъана, залымашихьванды даIгьвие гьалиб дикис чалыш диъи. Гъийгъа миди ягъмыш дишир абишды ки ва сиъине халкьдид ки йик1ыы гъад са мырад виъи — сиене эскерер джуды халыхда сагъна, саламатана хъидкьын, залым душмана гьалиб дишин.
Ихьды редакциеди выгыд журналистешды иджласа сес выъыр ай Азизханова Наидахда ки, гьа риъи СВО-ди иштрак гьаъара ад Курбанов Мурадды джандаады риши. Гьанийда хуткун-суалбыр гъыъыри, Мурадды шыв хабар ади, гьанийды кеф-ха1л шууна йиъиди. Гьа ихтилатбыр гьыъыри са чейед истакан варагъад вахтинды. Мурад йиъи редакциедид куллухчиед, яни, изды ки двоюродной шу.
Зарема Исрафилова
