26-хьусды апрелес ихьды ху1кийметед сиене джама1хтире юкьсура йыгыр ай субботникбыр. Мыха1д райондид джама1хтиреки эккед гьа1вас ана иштрак гьыъыри гьа субботнике, райондид ра1хъ-кьул, шеребыр-ма1хлебыр темиз йишир, усул гъана йиший, хьур.
Дайрады гвалахбыр гьыъыр ай мехьтебед йыкьа1хда хъуд, 2018-хьусды сыда дуьз-дуьузгюн гьыъыр ад сквер Победы, хьур, дур гьад парка. Гьа парк — хынымер дуьлхъед, инсан дуруъуд, сыдырка1д, ва кьухьды маджлисбыр гыргад джига йиъи. Мида бейдене 9-хьусды майед парадки гьади гыргасды йиъи, гьис хьурди гьади сихьир ани йиъи сириллабыр ВОВ-ди иштрак гьыъыд эскерешды дурубыр кихьир ад. Гьадыла гьа джига усла йыгынис балана убур выри. Сквер темиз гьаъас, хьур, хыва1 лешури райондид администрациедид ва мадды идарамыд къуллухчийше. Дайрады кюмегбыр гьыъыри «Волонтеры Победы»-хьур акциедид иштракчийше. Сиенебыр ари ха1ч1ур сквер Победы быт1рана усла-к1алба йыгыри.
Мадад идарамыд къуллухчийше ва мехьтебырмыд телебийше ки кьул-джубурна иштрак гьыъыри темизвалды увуху1нид акциеди.
Мыха1бишды газет агъахад идарадид къуллухчийше ки иштрак гьыъыри Всероссийский субботнике.
Гьа йыгъа гьабише езири ха1р джура ялар, геледжек гьабыр лаъ йидкьыйне, шилвалды викисне.
Гьадыла саваенди, руг-ч1ы1х темиз гьыъыри редакциедид идарадид саргъа1тала гъаъна гид джигыма.
Ха1рние джуда вуруъуд гвалах йик1 сихьир ваъара чалыш диъий, лешур хыле бер, ч1еверхий ва мадды вы-зыбыр.
-Гьемисе сытIана, ари хана гвалах ваъади, коллективед арыди ки хуIрмет къалин вуруъура, гвалах ки кIыб гувгъуIре, — гьухьури газетед баш редактора Тимур Махмудова.
Темизвалды увуху1н — ха1р са инсындид бырдж йиъи.
Эккед кIалыб, усул йыбкьыри районди ад муIкъмы субботник йыгыдыла хъуъ.

Зарема Исрафилова