Махачкалди, дружбадид Хала, гьувга выъыр ай «Сильные духом»-хьур документальный кино специальный военный операциедид йигитешиклады на ва гьабишды нинабашиклады.
«Сильные духом»-хьур кино выъыд СВО-ди йикьид иштракчиед нин риъи — Мехрибан Муслимова, гьа риъи «Сила матерей»-хьур регионмыд халькьмыд организациедид учредительница. Гьание гьа кинолентади гьагва гьыъыр а ихьды эскерешды йигитвалдыбыр, гьабишды Ватан хъывгынвалды ва подвигбыр. Киноере гьагва гьаъара нинды хасиет, ихтилат гьаъад джуду духарикла, гьу1мир выд Ватан ва хизан бадана. Ихтилат гьаъара, гьили лидкьыр, шууна кьухьва дишидбыр диъиди йигитер, гьабишды алалаъды гьу1мир ва гьабишды к1аъды ватандикла.
Гьа проекта эккене раази йишир регионад кьухьды Сергей Меликов, эккед кьимет выр гьадис, гьа гвалах хывкьыр бала лаазимдына. Кино гьувга выъыр ай 90-ды т1екьикьеды.
Гьа снимат выъыр ай Дагъыстандид 12-ды шегьерма на районма 6-ды вазырды арыди. Сиене сыт1а йишир ай 100-ды сагьа1тед ухьтанды материал, лешур ай интервьюбыр 10-ды СВО-дид иштракчийшды нинабашда.
«Сильные духом» фильм выъыд Мехрибан Муслимовара ихтилат гьыъыр ягъмишдишибишис, шууна выъыд виъиди гьа кино. Кинолентадире балад убур йыхыр а СВО-ди дишид йигитешды, гьабишды нинабашды йигитвалдымыд ва Великий Отечественный да1гьвиед иштракчийшды вахтиндылад мидийкьамаады арымыс.
«Зы эккене шад йиъи гьемисед йыхьды рышба1 а, хьур, ихьды дагъыстанабишды халкьдихда, тербие выр кьухьва даъад гьекъийкъатды йигитер, Ватан уву1ху1с мысга гьазырды. Ха1р нине, къариере, рышере, ришире къазамиш выъыр а эккед ихьды ху1рмет. Бес ха1р духарыс, шус, выг1лис ва дидис гьабише вылц1ара джуьхьды сигъынва1лид, хъыгынва1лид, йыхва1лид пай.
Ми фильм ихьды га1дийшиклаады виъи, гьабише джуьхьды гьу1мир выри е бадана, джуьхьды хизан бадана ва Ватан бадана. Гьа таарихбыр табата адгыр йыгара ихьды халкьдид фикирма на йик1е», — гьухьур Мехрибан Муслимовара.
Госдумадид депутата Султан Хамзаева сагъул-варулбыр гьыъыр Сергей Меликовас проекте иштрак гьыъынис гюре ва гьа хакьыр гьадис куьмег вынис гюре.
«Художественный кино ваъас раха1т йиъи: гьади сиене асыллы йиъи выды хит1иймыла, вада гыргас руъура адишды ранг-рухулбыр ки, фикирди йыдкьыд инсанарки. Амма ми виъи документальный кино, ми ваъас мысга джетин йиъи.
Ми киноере гьагва гьаъара, шууды риъиди гьекъийкъатды хьыдылды Дагъыстанди. Гьание йиъи уху1д хал, гьадат-нубат, дин ихьды», — гьухьур парламентариере.
Султан Хамзаева эккед гвалахна хывкьыр мисед документальный кино эккед площадкама гьувга выъын, ва гьаса йыхана гьувга выъыр йыгара мадды ху1кийметед площадкамаки.
«Сахьусды ми киноед лаъвалды, сиене йиъидкал гьагва гьыъын, шешин хите джыъын, мыхьджеб кидишне. Йиъидкал гьувга выъыр а ихьды 10-ды джигьилед йигитвалды ва гьабишды нинабашды гьунарбыр.», — гьухур гене депутатара.
«Сильные духом» киноехда гадкьы1дыла хъуъ регионад кьухьние Сергей Меликова эккед сагъул выъыр сиенебишис, иштрак гьыъыд кинолента гьаъад вахтинди.
«Ва миди экрана гьадгуд 10-ды нинабашила гъайри анидиъи шумуд иди веш ес бегедед нинабар йыгъ-лелер йыдкьыд, хъывгад веледдида дишир.
Изды фикирда, гьа эккед пример виъи сиене ихьды валаетдис – пример гьакьасабас, шунна е хыл-худ йывхы1р йыгарди сиъинбишис, гьалды веледмыра джуьхьды гьу1мир вырди ихьды валает бадана.
Зас миди йишин эккед дамах виъи, йисхьурди ми гвалах кьимет адишды виъи, ва мидис кьимет фикирдихьван ваъ, йик1ихьван вылц1ара. Гъийгъа е миди ягъмиш дишир ад йиъи, вац1ас хьур ес гьекъийкъатвалды. Сабыйды гьадикла – нинабашик не къариймашик кинивиъи», — гьухьур регионад кьухьние.
Сергей Меликова гене йик1ыы лихъийир Дагъыстанад халкьдид шаиред Фазу Алиевад ч1елбыр: «гьилаа вийирдики гюлле, гьа кивыркьара нинды йик1ик»
«Е-ва1 сиъинбише уху1р йыгара гьа йик1быр, гьабыр кьа1а1рды инсанашды йик1быр диш, хабар ад джуьхьды бырджекла сиене инсанашды улихьде, гьабыр йик1быр йиъи ес гьувга ваъад ихьды мидыла хъуъды гьу1мир. Виъинеки гьу1мир пай виъи «мидийкьама» на «мидыла хъуъ». Амма гьа «мидыла хъуъ» е выъыр йыгара мааки йыха, быт1рана, гьаатхы1бишды хатирес, — гьухьур республикадид кьхьние.
Б. МЫХАIДЫ
