4-хьусды августас Дагъыстандид кьухьды Сергей Меликова выгыр ай иджлас мадды регъберешихьван сыт1а.
Сахьусды кьул, республикадид кьухьды Сергей Меликова къутли гьыъыри Дагъыстандид строительствадид министрес — Бахтияр Уллаевас гьухуд йыгъ ва сагъул-варулбыр гьыъыри гьанийис кьуле выгыргара ад гвалахас гюре.
Гьа иджласа хьуъ гет1ир ай ха1р джура суалбыр, ва гьадыхьван сыт1а республикадид кьухьние гет1ир ай суалбыр джу хьури гине кьуле гыргаъ, хьур, тапширмиш гьыъыд гвалахмыд бадана.
Хьурагине ихтилат йишири Махачкалди ад М. Азизова кучиди гид халды 27-ды квартирама ремонтбыр хъыъыр бегьем дишир а, хьур. Сыдыд ахирайыкьама сиене халмыд иессийшда ц1ине хъыъыр ад халма хъидыкьас йикиси. Йик1ыы лихъиес йигара, гьа халык ц1ай китхьур, чардах ливк1ур лапт1ур ай.
Кьва1дхьусды гьалгыри Дагъыстандид Правительствадид Седри Абдулмуслим Абдулмуслимов. Гьание ихтилат гьыъыри гьыъыр ад езелмыд а1гьвалатакла.
-Мистед сен бала джетинды йишири на1кьвудыкла ма1хсил лепшуд замха1ткешешис.
«Хумухун къурах вишири, кьы1дид культурамыс лазим йиъид гьугъалбыр гьыъыр диш, хьад ки мыкьды йишири. Амма ихьды замха1ткешешды гьунырдире йыхды ма1хсил лешус йишир а, хьур, гьухьус йикиси», — гьухьури премьере.
2024-хьусды сыда Дагъыстандире гьыъыд езелмыла лешури 252 млрд манутала артухды хайир. Гьаса йишийне Дагъыстан вишир ай 8-хьусды ера ва 2018-хьусды сыдыхьван ари хихьийне 5-хылис хьуъ йибкьыр а.
Кьы1нне малмыс йыхьасды ембырки гьазыр гьаъара а, гъийгъад йыгъа миллионала артухды тонн нахвмыд ягъмиш хъыъыр а, сиене сыт1а 1,5 млн тонн хьынад гьазыр гьаъасды ниятбыр ани йиъи.
Дагъыстандире йиъи баласды бахчевой культурабыр силгад ху1кийметед рынокмы. Гьабыр мисте езир ай 8 гьагъзырды гектара, гьалаки гьамыд ери лахъагъуйне йишир а 80 гьагъзыр тонн. Косточковый культурамыд сурааки республика хьури гини виъи. 2024-хьусды сыда 93 гьагъзыр тонн ягъмиш хъыъыр ай.
Ц1ыц1аше зиян джывын бадана 33 гьагъзыр га обработать гьыъыр а дарман гъивхьир. Ва джат1ур макъыет дуруъура саранча тукмиш джившин бадана.
Гьадыла савае, Абдулмуслим Абдулмуслимова руг-ч1ы1х саъад джигымыд карантинный гвалахбыр йыгыр йигадид суал хьуъ гет1ири, малмык, нахчирмык шывга ядалбыр киджитхьун бадана. Сергей Меликова фуланды меслягьа1тес разивалды выри.
Мирджед суал йиъий тукад. Гьа суалад бадана гьалгыри вице-премьер Манвел Мажонц.
-12 июляла хъуъ сиг1ынбыр ани йиъи Дагъыстанди, гьадыхьван сыт1ана тукбыр ки бала кырха1ре ани йиъи инсанаше.
6-хылис лаъ йидкьыр ани йиъи тукад расход 15-ды июляла 24-хьусды июля йыхы1р. Эккед нагрузкамыра аварийный отключениебыр гьаъас маджбыр дишири, амма шесды на хьура гид сыдырмыхъаъ мисте авариебыр ц1ам йишири.
Шегьер йыгъ-йыгъала экке вуруъура а, тукад расход ки лаъ йиъине а, амма сиене тукмыд инфраструктура ц1ине ваъасды гъийкьыд тангабыр адиш, — гьухьури Манвела.
Гьа суалад бадана регионад кьухьние тапширмиш гьыъыри лейихды услахьван гьазыр гьаъ, хьур, обращение федеральный властед ва тукмыд компаниядид дуруу сигасды.
Хьа1ликана гьалгыри вице-премьер Рамазан Джафаров. Гьание доклад гьыъыри республикади хатыдихьван кирхьвад ц1аймыд бадана. 1-хьусды апреляла хъуъ региона гьыъыр а Джурад противопожарный режим. Гьадыла хъуъ, Рамазан Джафаровды ч1илмыхьван, выгыр а дайраады гвалах Дагъыстанди ц1айбыр китхьун ц1ам йишин бадана. Муниципалитетмыд кьухьдыбишде ва пожарникешде тапширмиш гьыъыр а сиене хьуъ гийтхьуд нарушениемыс быт1рана убур йыха1ъ хьур.
Мисте гъы1ннеки ц1айбыр китхьур ай кьиямат мамзилмык — 150-дыхъунды гектар хакьыри сиене гьутхьуд ербыр ара лихьийне. Лап кьухьды пожарбыр йишир ай Ногайский не Тарумовский районма. Гьабыр сиене кахъагъур а, амма Унцукульский районди ц1ай кахъагъус гьала ки йишир адиш.
Гьа суалад бадана Сергей Меликова хайиш гьыъыри:
-Быт1рана макъыет диш, хьур. Пожармыла а1хтиетвалды гюзет ваъ, хьур, джама1хтихьван ки далга, гьис хьурди, пожармыра эккед зиян-зарарбыр вылц1ара ч1ирис-ч1ыкыс ва республикадис.
Зарема Исрафилова
