Дагъыстанад Кьухьние Сергей Меликова иштрак гьыъыр РФ-дид Госсоветед Комиссиядид иджласа агъмиш гьаъади СВО-дид иштракчийшис куьмег высды суалбыр. Гьа иджлас выгыр ай РФ-дид Президентед помощникере, Госсоветед секретаре Алексей Дюмине, республикадид кьухьнийды пресс-службадире выъыд хабардихьван.
Регионмыд кьухьдыбише выр ай информацие, шууна выгыргара ади гвалах эскерешихьван ва гьабишды хизынмыхьван еринды, тааныш дыъыр гьадыла хьурагине выгыд гвалахахьан ва шыв гьаъас йикисды ц1инды мидыла хъуъки.
Ху1кийметед советед Комиссиядид кьухнийды, Астраханский областед губернатор Игорь Бабушкинед СВО-дид ветеранашды ва гьабишды хизынмыд суалмыд бадана гьыъыд ихтилатахьван, сиене сыт1а РФ-дид Госсоветед Комиссиядид иджласа хьуъ гет1ир агъмиш гьыъыр ай 40-ла балад суалбыр, шууна мааки йыха гьаъасды вылц1ара ад куьмег СВО-дид иштракчийшис.
Йик1ыы лахъахара, бегедене викисды Госсоветед Президиумад иджласа, валаетдид Президенте Владимир Путине выгыргасды, агъмиш гьаъасды йиъи СВО-дид иштракчийшис куьмег вынид суалбыр. Гьадыла хьурагине Алексей Дюмине гьухьур ай, гьа иджласа Президентес гьагва гьаъас гьа предложениебыр спецоперациедид иштракчийшис вылц1ад куьмег мааки йыха гьаъасды.
Дагъыстана эскерешис ва гьабишды хизынмыс куьмег вынид суалмыс сахьусды кьул убур рыхы1ре а. Сергей Меликова гьа суалбыр джат1ур хакьыр а джуды контроля.
Региона анийиъи 26 джура ху1кийметед куьмег эскерешис ва гьабишды хизынмыс вылц1ад ва гьадыла саваенди яшайишед гарантиебыр ки, гьамык кине выплатабыр, артухды планак кидишды медицинадид куьмег, накьумыд ербыр вын, кьад коммунальный услугамыд тангабыр хъывын, раха1тене ка1ч1ус йишин эскерешды хынимешда вузма на колледжема. Дестикь гьаъара а суалбыр гвалахмы дыъынид — гвалахмы дыъыр а 200 эскер. Кит1ир а 695 социальный контракт бизнес ачых гьаъас йикисды, хусуси мал хакьас йикисды куьмег ва мадды джетинвалдымыс куьмег вын.
Дагъыстан кинивиъи сахьусды регионмык, беслемиш гьыъыд регионмыд программабыр иштракчийшис ва ветеранашис специальный военный операциедид куьмег высды. Республикадид проект «Доблесть гор»-хьур бегемиш йишир Президентес Владимир Путинес. Программадик кид ка 35 СВО-дид иштракчиер ха1р даъас ху1киметед органма гвалах ваъас, дележек гвалах ваъас йикисне гьама.
Сергей Меликовды предложениедыхьан выъыр а Комитет Дагъыстан Республикадид Халкьдид Маджлисе СВО-дид иштракчийшды ва ветеранашды суалбыр кьуле гыргасды ва выъыр а СВО-дид иштракчийшды ва ветеранашды гвалахмыд отдел РД-над Кьухьнийды Администрациедид ва Правительствадид структуради. Региона гвалах ваъара филиалара Госфондад «Защитники Отечества»-хьур, республикадид соцфонд «Все вместе»-хьур, выъыр а регионад халкьдид организация «Память гор»-хьур.
Республикадире йик1ыыла утха даъара адиш джуды йигитер, гьу1мир выд Ватан бадана, – 47 муниципалитете ачых гьыъыр а «сады памяти», луза гьаъара а мемориальный плитабыр. Сергей Меликов джат1ур ха1сил руъура а дыркьыд йигитешды хизынмыхьан ва куьмег гьаъара гьабишды яшайишед джетинды суалбыр кьуле гыргас.
Дагъыстанара спецоперацие сахьусды йыгъала ка1ч1удыла хъуъ куьмег вылц1ара а эскерешис да1гьвиед к1еъэ гид: специальный военный операциедид зонади сигыр а 25 гьагъзыр тонн гуманитарный куьмгид.
Б. МЫХАIДЫ
