29 январес 2025 сыда Россиядид президент Владимир Владимирович Путин Кремлиди хаIсил йишир ай Дагъыстандид кьухьды Сергей Алимович Меликовыхьван. Гьади хьуъ гет1ир ай суалбыр республикадид а1гьвалатакла, шыв гвалах выгыргара ади регионад экономика лаъ йишин бадана ва йыха йишин бадана инсанашды яшайиш.
Сергей Меликова гьухьур, гьа1тхы1д сыда лаъ йишир а Дагъыстандид промышленность — 6,5 % ва сельский хозяйство — 7 %. Дуллухбыр инсанашды лаъ йишир а — 15 % ва средний дуллух йишир а 40 гьагъзыр манут. Гьадыла саваенди дайраа бала йидкьыр а инвестициябыр. Шесды сыдыд 9 вазырды арыди капитала ад танга 16-ды процентала бала вишир а.
Генеки гьади хьуъ гет1ир ай суал, шууна бюджет кьуле йыгыр ади республикади — 97,6 %. Дагъыстан гъа гьа суалаа 14-хьусды ераа Россиядид регионмыд арыди. Меликова гьыъыри ихтилат 6-ды проектекла, кьуле гыргасды, лаъ йишин бадана инсанашды яшайиш, экономика ва гьамыра высды инсанашис гвалахбыр, йыха викиси республикадид инфраструктура.
Гьа суалбыр кьуле йыгын бадана сахьусды убур йыхы1р йигара гъилы лахъахара ад источникмыс энергиедид.
2022-хьусды сыда Дагъыстанди гвалах ваъара кувч1ур а виргъихьванды элекетростанциедире, гьадире вылц1ара а 15 МВт. Гьаадхы1д сыда октябрь вазыра Дербентский районди ка1ч1ур ваъара генеки са виргъихьванды электростанция, гьадире высды йиъи 102 МВт. тукад. Росатомахьван сыт1ахана гьаъара ка1ч1ур а ноябрь вазыра Новолакский районди хьыблихьван гвалах ваъад электростанция 300 МВт мощность ад. Гьадид бюджет йиъи 50 миллиард манут, гьадыхьван сыт1а ачых руъура а 70 ер инсанашис гвалах ваъасды.
Владимир Путине хуткури, шыв агьвалат ади туристический отраследи, шудаъ бала дуруъура ади туристер. Республикадид кьухьние гьухьури, сен-сыдыла туристер бала дуруъура — гьа1дхы1д сыда респбуликади йиркьыр ай кьва1д миллион духъунды инсан.
Гьадис гюре дерьягьад къирахбыр дуьз-дуьзгин гьаъасды йиъи федеральный программадыхьван «Пять морей и озеро Байкал»-хьур дур гъад. Ваъасды йиъи 28 гостиница, гьа гостиницабыр йикисды йиъи хьибды ва юкьды ха1диед, йигад инсындида ешемиш йикисне. Генеки гьаъасды йиъи Каспийский дерьягьад къирхыда россиядид хынимешисды центр, гьухьури Сергей Меликова.
Зарема Исрафилова
