РД-над кьухьды Сергей Меликов «Возвращение героев»-хьур круглый уст1улад седрине гьалгыр Кавказский инвестиционный форума.
Республикадид Кьухьние ихтилат гьыъыр шыв кюмег вылц1ара ади эскерешис не гьабишды хизынмыс, выъыр гьа хабар регионад Кьухьнийды пресс-службадире.
Меселла, федеральный кьарармыхьван сыт1а республикади кьабыл гьыъыр а шумуд иди нормативный не правовой актбыр, ху1кийметед суруула высды кюмгимыд, льготмыд ва гарантиемыд. Сиене высды кюмгимык кинивиъи тангымыдки. Гьа виъи вылц1ад единовременный выплатабыр контрактникешис, мобилизовать дыъыбишис, добровольцыйшис, дыркьыбишды хизынмыс.
Сахьусды кьул кьуле гыргара гвалаха дыъынид суалбыр — гвалах выр а 151 инсанас, рыхы1ре а субсидиебыр бизнес ачых гьаъасды. СВО-дид иштракчийшды хынимешис гьаъара льготбыр институтма ва колледжма кадгъу1ди, вылц1ара стипендиябыр, учур адишне кьабыл даъара хынимер детсадма, кьа1рене кывылц1ара улесдыбыр мехьтебырма.
Гьадыла саваенди, эккед кюмег йиъи вын эскерешис накьудид ербыр. СВО ка1ч1уд сахьусды йыгъырмыла хъуъ гвалах ваъара а «Все вместе»-хьур фондара, ха1р са йикьид эскеред хизындис джураана социальный кюмег вылц1ад.
Кьуле выгыргара а «Доблесть гор»-хьур программа выъыр ад специальный военный операциедид иштракчийшис не ветеранашис. Сыт1а йыхана гвалах выгыргара а «Защитники Отечества»-хьур Госфондад филиалахьван.
СВО-дид ветеранаше выъыр а «Память гор»-хьур халкьдид организация, гьадис вылц1ара сиене лазимды кюмегбыр. РД-над Халкьдид Маджлисе выъыр а джурад Комитет СВО-дид ветеранашды ва иштракчийшды гвалахмыд.
Гьадыла саваенди, 2025 сыда гьаъара ка1ч1уси гьамыъды вахтиндире ягъа1д реабилитационный центр СВО-дид ветеранашис Каспийский дерьягьад бегеде.
«Кюмег вын, хыл йывхы1н эскерешис не ва гьабишды хизынмыс — республикадид властед органмыд сахьусды гвалах виъи СВО беслемиш йишидыла хъуъ. Ихьды сахьусды задача – ля1гъу1дыхъун йыха ва раха1т гьыъын яшайиш ветеранашды на ва гьабишды хизынмыд», – гьухьур Сергей Меликова.

Б. МЫХАIДЫ