Дагъыстанад Кьухьды Сергей Меликов йыхьыр ай ветеранахда Великой Отечественной войны, Россиядид Йигитахда Ибрагим-Паша Садыковахда ва къутливалдыбыр гьыъыр гьанийис байрамад – Ватандид Йигитешды Йыгъад.
«Ибрагим-Паша Султанович, Вы гьамыъ ихьды Дагъыстана гьекъийкъатды Йигит йиъи. Ва сахьусды хылис байрам ваъара а Ватандид Йигитешды Йыгъад медалехьван «Къизилед ХаIдий». Дюзвалды йыбкьыр ВыIхьди хала: Верховный главнокомандующиере Второй мировой даIгьвидид эскерес выри эккед кьимет. Ибрагим-Паша Садыков Россиядид Йигит йиъи, хьур, е дамах ваъара, хьурагине дамах ваъад кал ихьды автоматчикешды отделениедид командир йиъий, хьур», – гьухьури регионад Кьухьние.
ЙикIыы лихъийис, майес Россиядид Президент Владимир Путине выри 100-сен йишид ветеранас «Къизилед ХаIдий».
Гьамыъ, регионад кьухьды джухда йыркьыйне, Ибрагим-Паша Садыкова гьыъыр ихтилатбыр Сергей Меликовас выдж хаIсил йишидкал валаетдид президентехьан ва гьагва гьыъыр джуды гьади йыхыIд шикилбыр.
«Сагъул виъи Вас захда аIчIунис гюре. Гьа «Къизилед ХаIдий» къазамиш выъыд виъи джигьил Ибрагим-Пашара 1945 сыда, амани гьа заа ливкьыри гьамыъ Выды куьмгихьан. Къисмат виший Вас эккед сагъвалды, Сергей Алимович!», – гьухьур ветеранара регионад Кьухьнийде.
РД-дид Кьухнийды суалас: «Руъусиме, хьур, Москвади Победадид юбилеед Парада?», Веш сен йишид Йигитере шадана джываб выр: «Гьелбеттики!».
ГьацIара хъаъара, январес 2025 сыда Ибрагим-Паша Садыковад 101 сен йикиси.
1941 сыда гьа джуду гьашкьдыхьан даIгьвиди йыхыр, валаетди кувчIуйне Великая Отечественная война. Армавирди кьылебырмыд часте автоматчиквалды хаIр выъыр, гьадиъ Туапседа сигыйне. Хьели иштрак гьыъыри даIгьвиди Ростов-на-Дону шегьердид бегеде, гьадыла хъуъ январес 1942 сыда Сталинградский Битвади. Осколкадире гъил йыхыIр яраллы йишийне, госпитале йишири ва гьадыла хъуъ сигыри Крымди, стрелокашды дивизиедик кине батмиш даъара ай душманар Керчь шегьерди. Шегьер бадана гыргара ад бойма Ибрагим-Паша Садыков кьваIдхьусды хылис яраллы йишири.
Сагъ хъишида хайиш гьыъыр маа даIгьвиди сихъига, хьур, ва сигыр Тулади ад танкмыд часте, гьада десантад автоматчикешыхьан сытIа 48-хьусды джурад гвардейский танкмыд полка ана иштрак гьыъыри Курский битвади. Ибрагим-Паша Садыкова иштрак гьыъыри освободит гьаъади Киев ва Львов, хьели фашистер йихъдиргади Варшавада. Апрелес 1945 сыда иштрак гьыъыри даIгьвиди, Германиедид накьуды выгыргара ад. Маа яраллы йишир Варшавади госпитале йишири, хьеликана – Новосибирскади. ДаIгьви лабтIуйне ватанды хъиркьыри.
Наградит гьыъыр а орденмыхьан Славы II и III степенмыд, орденехьан Отечественной войны I степенед, медальмыхьан, «За оборону Сталинграда», «За отвагу», «За освобождение Варшавы», «За победу над Германией в Великой Отечественной войне 1941-1945 гг.», саки почетный гымышед орденехьан «Общественное признание».
Б. МЫХАIДЫ
