Дагъыстанад Кьухьды Сергей Меликов гьаIсил йишир Россиядид Йигитехьван, «Время героев»-хьур президентед программадид иштракчиехьван Темирлан Абуталимовыхьван, выъыр ад республикадид кьуьнийды пресс-службадире хабардихьван.
Темирлан Абуталимов гьала ки мара стажировкади программадик кид-ка, гьанийды магьаIлим йиъи Сергей Меликов. Гъийгъад йыгъахьван Россиядид Йигитед бегьем вишир а кьылевыъын кьваIдхьусды модулехьван.
ХаIсил дишид вахтинди республикадид кьухьние хуткунбыр гьыъыр, шууна виширди модуль ва шууды гьагедене хьуъ гийтхьурди суалбыр на йыгад гьакьасабыр. Темирлан Абуталимовад чIелмыхьван, кьылевыъын хайир гъад вишир, кьваIдхьусды модуляхьван гьанийда йишири гвалах ваъас Дагъыстана гъаъна.
«Йе самолетахьван дыхьыри Сахалинский областе, тааныш дишири хуIкиметед кьухьвалдымыд гвалахмыхьван, дыхьыри Курильский островмы. Бала гьаламат йишири, меселла, Сахалинский областе аниъи эффективностед министр, гьади гьабыр чалыш диъи аIтиетне выгыргас йыгад гвалах сиене хуIкимед управлениедид джигима.
Гьадыла саваенди дыхьыр ай Нижегородский областе, тааныш дишир хаIрджура министерствамыд гвалахмыхьван ва ихтилатбыр гьыъыри губернаторахьван. Йыхана хаIр даъара ай тангымыд на экономикадид гвалахас, коммуникациямыд ва инвестициямыд суалбыр ки балана агъмиш гьаъарай. Сиене сытIа, стажировка вишид арыди балад гьакьасабыр гьацIыр гьа гвалахмыд сураа. Зас сиене бала бегемиш йишири», – гьухьур Россиядид Йигите.
Сергей Меликова джуду суруула гьухьур, мадды регионма ад йыхды гвалахбыр Дагъыстана йыкьас йикиси, сахьусды кьул гвалахад эффектиность лаъ выгыргасды. Гьание гьадыла гъайри хайиш гьыъыри балад убур вияъ, хьур, вацIара ваъас гвалах парламентед не ва муниципалитетмыд.
ЙикIыы лахъахара, «Время героев» – гьа выъыр ад виъи валаетдид Президентед инициативадихьван кьухьваIлид гвалахмыс хаIр даъас хьур российский ветеранар на ва СВО-дид иштракчиер. Программдик кедир а 83 инсан

Б. МЫХАIДЫ