9-хьусды декабред йыгъ — ихьды хуIкимете Ватандид Йигитешды Йыгъ.
Гьа байрам гивхьир ад виъи ватандид Йигитешды гьунарбыр на гьабишды дурубыр мааки лаъ-хьуъ кетIес хьур. Ва гьабишихда гьухьус, хьур, «Сагъул, аферин ваIс, ихьды Йигитер!»
Гьа йыгъа ихьды кьухьды валаетди баласды идарамыра ва мехьтебырмыра гыргара маджлисбыр Йигитешды хатирес.
Гьа йыгъа МыхаIбишды маданиетед зала ки йыгыр ай кьухьды митинг.
Гьади иштрак гьыъыри МыхаIд райондаады СВО-ди дыркьыд Йигитешды ришиймаше, дидабаше-нинабаше ва бейдедбише.
Сахьусды Йигитешихдад лейихды чIелбыр гьухьури МыхаIд райондид маданиетед гвалах кьуле выгыргара ад Сулейманов Саид Гаджиевиче.
ХьаIликана лалгыри Салманова Индира Рагимовна. Гьание гьухьури: «Гьеми байрамад йыгъа зас артухана кьыле гьаъас йигара специальный военный операцияди иштрак гьаъара ад йигитешис тербие выр ад нинабашды-дидабашды дурубыр. Кьухьды сагъул виъи сиенебишды сураа гьабишис. ХаIр са дидды-нинды йикIыы гъад мырад игъивкьый, духре сагъ-саламатна сиенебишды халма хъидыкьый, душмана гъаалиб дишир».
Гьанийила хъуъ гьалгыри МыхаIдид маданиетед Халды директор Абдуллаев Абдулла Муртазаевич.
ХаIликана сенидыы сес выъыри СВО-ди кичмиш йишид ихьды Йигит Садранов Магомед Робертовичды ниныхда. Гьание арзуламиш гьыъыри ала-лаъ диъине ад хынымешис, джигьилешис джыгынвалдыбыр, четинвалдыбыр гьамалугуй, хьур.
ЧIелбыр гьухьур бегьем дишида хъуъ, сенидыла нагьнибыр гьыъыри МыхаIды дур-ун ад артистеше, гьа наIгьнимыд чIелбыр йиъий патриотизм лаъ ваъасды нетидже ад. Лейихды макьамбыр йыхыIри группа «Аяз»-ад накьрачийше.
Мехьтебед телебийше кьыле гьыъыри Йигитешихда хъитIир ад шиъирбыр.
Гьабише кьыле выъыр ай Хьичады шаир Саид Гусейнова Россиядид Йигит Магомеджанов Магомедали Камильевичыхда хитIид шиъир «Фулфанад на Россиядид Йигит» ва Рамазанова Бийзата кихьир ад шиъир «Выхьды гьунарбыр адгаси таарихе».
МыхаIд райондид Хынымешды музыкальный мехьтебере ки бала уфтанна иштрак гьыъыри гьа маджлисе. Джухьды магьаIлимер ки кьуле гине, бала бытIрад ухшер выгыри гьади музыкальный мехьтебед телебийшды выступлениемыра.
Маджлисед ахирес Саид Сулейманова гьыъыри балад сагъулбыр СВО-дид иштракчийшды бегедедбишис, вахт гьувгур гьемиди йидкьыр иштрак гьыъыри, хьур.
Зарема Исрафилова
