27 ноябрес Дом дружбади Дагъыстанад Кьухьды Сергей Меликов хаIсил йишир общественникешихьан, куьмег вылцIад спецоперациедид иштракчийшис ва гьабишды хизынмыс.
Гьади ягъмиш дишир ай фондмыд кьухьдыбыр, волонтерар ва дагъыстанабыр, кьуле гыргад проектбыр, эскерешис куьмег гьаъад. Гене гьади ай эскерешды нинабар, ришиймар ва къариймар, гьа проектма иштрак гьаъад джюхьды кюмгихьан.
Сергей Меликова ягъмишдишибишис сагъул-варулбыр гьыъыр, выгыргара ад йикIяя лувзур гвалахад бадана.
«Гъийгъа йе миди сытIа дишир а агъмиш гьаъас лазимды суалбыр куьмег гьаъасды специальный военный операциедид иштракчийшис ва гьабишды хизынмыс, Джурад сагъулбыр йиъи ихьды хынимер бала ад хьылешис ва волонтерашис», – гьухьур гьание.
Джураана республикадид кьухьние эккед сагъулбыр гьыъыри СВО-ди иштрак гьаъара ад йигитешды нинабашис, гъийгъад йыгъа джваIршда руъуд куьмегбыр вылцIара ад джуьхьды духрешыла гъайри ва мадды йигитешды хизанмыс ки.
Гьади иштрак гьыъыр ай хьибды Россиядид Йигитешды нинабаше, гьабишик кий Марина Исбакиева – 13-хьусды Россиядид Йигитед Магомед Исбакиевад нин.
«Волонтер-хьылеше джваIршда лягъуд куьмегбыр вылцIара а.
ВаI са гуманитарный куьмег выс ва связь хакьас хизанмыд на эскирешды чалыш диш, гьадыла саваенди ваI гьабыр шад даъара, бала лазимды гвалах ваъара гьабишис даIгьвиди. Выхьди кьуведире, йикIид темизваIлире куьмег вылцIара ихьды эскерешис, гьабишис гьацIын бадана джваIр тек дишды, джуьхьды йыкьахда куд сиене ихьды халкь. Ва ваI диъи ихьды халкь.», – гьухьур республикадид кьухьние.
«Выхьды чалышвалдымыра гъийгъа куьмег вылцIара ес увухуIс савалды, дуьзгинды тербие выс ихьды джигьилешис джаала хьуъ вылцIад кал ихьды валаетди ва шад даъара ихьды йигитер даIгьвиди ад. Зас сагъулбыр гьаъас йыгара ваIс, выхьды йикIяяды иштракваIлид чалышваIлелис выгыргара ад гвалахас», – гьухьур ягъмишдишибишде регионад Кьухьние.

Насир Ибрагимов