Дагъыстандид кьухьды Сергей Меликова на «Газпром межрегионгаз» идарадид генеральный директор Сергей Густова, джва1р ха1сил дишид арыди, хьуъ гет1ир ай республикадид газад система дуьз-дуьзгин выъыныд суалбыр.
Гьемиса1гьа1тди «Развитие и газоснабжение 2021-2025 сыдырмыд» рухьуд Программадыхьван 15 му1къу1д саргъа1та газ лийкьа гьыъыр а, гьадис гюре 2 гьагъзырала артухды халма газ кит1есды чара вишир а, 33 котельный ки хъывгыр а газаа.
Догазификация программадыхьван 11 гьагъзыр соглашение кихьир а, 7 гьагъзыр гьамыкла хусуси ерымыд са1ргъа1теде йыгыр бегьем гьыъыр а. Гьадыла саваенди 11-ды кьылевыъынмыд ва медицинадид идарамыра сигыр ад суалмыс разива1лды выр ани виъи газ кит1инид бадана, гьамыкла 5 идаради газ йыгыр бегьем дишир ани диъи.
Сахьусды бала убур рыхы1ре ани йиъи льготабыр сирхьвад инсанашис, гьабишис вырц1ара ани-виъи 100 гьагъзыр манут, газ гыргас лазимды вы-зы лешун бадана.
Сергей Меликова на Сергей Густова гене ки хьуъ гет1ир ай «Единый оператор теплоснабжения» идарадид гвалахад суал 2022 — хьусды сыдыла хъуъ лазим йиъидкал дуьзене гвалах ваъара ад региона. Гьа идарадид гьунурдихьан 77% газ лийкьа гьаъара а теплоснобжениедид кьуле гид объектма. Гьадыла саваенди, гьа операторад гьунурдире руъура ани йиъи лазим йиъид кал вахт-вахтинды тангабыр ягъмыш хъаъас, ишлемиш йишид энергоресурсмыд.
Хьа1ликана гьабише хьуъ гет1ир ай газораспределительный сетьбыр ари йыха1 гьыъынид ихтилат «Газпром межрегионгаз» организациедихьван.
«Гьемиса1гьа1тди сиене сетьмыд иессиер дац1ара дишир а, гьадис гюре гьамыъ еда йикиси хъуъ сидживир гьайвырди ц1инды объектбыр на му1къбыр газад сетек кит1е гьаъас ва гьадихьан сыт1ана лазим йиъид кал гъийкьасна сигас газ дурбыма хьуъ, — гьухьури Республикадид кьухьние.

Зарема Исрафилова