7-хьусды августас Дагъыстан Республикадид Правительствадид Седри Абдулмуслимов Абдулмуслим Мухудинович йыркьыр МыхаIд районди, зиянбыр выр ад эккед гьугълумыра .
ЙикIиы лихъийис, 26-хьусды июляла 28 июля йыкьама Дагъыстана сасад районма лугъур ай эккед гьугъалбыр, зиянбыр выр, гьадис гюре йишири районма чрезвычайный ситуациебыр. МыхаIд района Самур нацIурура, гъаъ игъибхьур джуды къирхыма, гейир километр нацIурды къирахад ва гьатIва гьыъыр гьадихьван сытIа машинмыд гыйгъыIнвалды.
Хьидире гаахара-гаахара минкир виъи гейинис 15 хал-лах, зиян вынис больницадис ва тукад усмыс. Эккед зиянбыр выр а аъна муIкъмыд муниципалитетма ад рыIкъмыс ва 6-ды километрия йыхыIр хьидид турбумыс.
Ремонтад ва юкьсур дюз-дюзгин хъаъасды гвалахбыр гьугъалбыр хъахъатIуда беслемиш гьыъыр а. МЧС-дид къуллухчийше, рыIкъмыд ва коммунальный службамыра джатIур гыргара а лазимды гвалахбыр, кIалба усла хъыгас хьур вахтинди сиене гьугълумыра зиянбыр выр ад джигабыр ва инсанашис рахаIтвалды кIыб ка хъаваъас хьур районди.
Районди йыркьыдаа премьер-министр таныш йишири выр ад эккед зиянмыхьван, йишид гьугълумыла хъуъ муниципалитете. Йыхьыр сиене джигима джуду кьвунды улис гьагусна гахъыр нацIурыра гейир ад джигимыхда, раIхъмыхда ва водопроводмыхда.
Гьадыыла саваенди, Абдулмуслим Мухудинович таныш йишир цIинене луза гьаъара ад объектмыхьван – МыхаI выгыргара ад водопровод ва Шиназ муIкъаI ваъара ад мехьтеб.
Абдулмуслим Мухудинович встречать гьыъыр МыхаIд райондид кьухние Сулейманов Давуд Амаевиче ва Республика Дагъыстанад Халкьдид Маджлисед депутата Абдуллаев Шафи Кафлановиче. Гьабише премьер-министрес гьыъыр ихтилатбыр сиене гъийгъа ад районди агьвалатад ва гыргара ад гвалахмыд дюз-дюзгин хъыъын бадана сиене джигаабыр.
МыхаIд районди йыркьыдаа хъуъ Абдулмуслим Мухудиновиче выр ай лазимды поручениебыр районад ва мадды кьухьдыбишис кIыб ка бегьем гьаъ хьур гыргара ад гвалахбыр.
Дагъыстан Республикадид Правительствадире выс хьур сиене лаазимды куьмег МыхаIд районас, зиянбыр выр ад балад гьугълумыра. Районас сигас хьур сиене йыгад карбыр кIыбди гъилыы лихъийин бадана чIир гьыъыр ад объектбыр, ва рахаIтвалды хъившин бадана халкьдис миди ад.
Б.МЫХАIДЫ
