29-хьусды октябрес МыхаIд райондид администрациедид актовый зала райондид кьухьные выгыр ай иджлас МыхаIаIды арендаторашихьван.
Гьади иштрак гьыъыр ай райондид кьухьды Давуд Амааевич Сулейманова, МыхаIд сельсоветед седри Раджаб Юлдашбалаевич Гасантаева, арендатораше ва мадды сес выъыр ад юлдашеше не журналистеше.
Сахьусды гафахьван иджласад гвалах ачых выъыри райондид кьухьние Давуд Сулейманова. Гьание гьухьури, сиене накьвбыр арендади хад юлдашеше вахт-вахтинди выр йыгара джуьхьды договорара ягъаIдкал вергибыр на гьакьгьасабыр. Ишлемиш ваъ лаазим йиъидкал хад хание джуда накьв. Нагагь, гьалысга вахтинди йиъидкал выс джиганахъун арендадид гьакь-гьасабыр, ишлемиш джаваъанахъун накьв, сихъиве.
Хьибды сыда накьв ишлемиш джывыъыхьвна, йе гьа накьвбыр, судахьван ляIхъаIшур, гвалах ваъас йыгад инсындиде хъывыси.
Хьели райондид кьухьние хьуъ гетIир суал иессисызвалды выъыр рыкъаI-кьуле ад йыванашды на йымаIлешды эйлугад. МыхаI, мидаасаъ чIалагада рыкьаI машин йихъивгасна диш, йиъидыхъун рыкъыIд мисур-тисур йыван виъи йыгъа-выше, гьадыла вышед арыдыы шумубъиди аварибыр машинмыд йишири.
Йыванар мукъуIд арыди йыгаддиш, мысга джаалахьуъ банаа-сываа гъад йиъи, гьади виъи гьамыд ер, кьыIнне — высаа, гъыIнне — хинаа, гьухьур Давуд Амаевиче.
Гьадыла савааенди, гьание тапширмиш гьыъыр МыхаIд сельсоветаа ми суал джуьхьды хыIваI леш, хьур. Суьхьтед загатскотад баазади ийга, хьур, иессисызды малгъарабыр, тааки иесси йыркьыр джарма вылцIама.
Хьели гьалгыри администрациедид юрист Мурад Рагимов. Гьание гьыъыр ихтилатбыр, шууна ягъаIре ади кьарардире гьа гвалахбыр.
Райондид баш малдухтурара Нариман Омарова гьыъыри ихтилат рыхыIре ад малмыс биркIамыд, гьаъасды вакцинациемыд не профилактикадид.
— Къара малмыс биркIабыр йыхыIр йе бегьем диъи. Хьудхьусды октябрала мистед сыдыд ахираайыкьама йыхыIр бегьем дишир йыгара биркIабыр йыванашис не чIабалашис.
Йе дилег гьаъара сиене мал-къара ад юлдашешыхда, вияъ йес, хьур, кюмег вахиндиана гьа гвалахбыр кьуле-джыбра гыргас. Ихьды духтурар йыдкьыйне, хакьас выхьды малбыр кюмег вияъ, са духтурашис руъура джетин, кюмег джывылцIади, — гьухьури Нариман духтурара.
Генеки гьа иджласа далгыри: райадминистрациедид экономический отделед къуллухчи Г. Рамазанов, арендаторар Н. Гаджиалиев, А. Таиров, Д. Ризаков ва мадды юлдашер.
Арендатораше хайиш гьыъыри сельсоветада на райондид кьухьнийда дюз-дюзгин хъаъ, хьур, ЛыхцIырак не Мыгра руъуд раIхъбыр.
Гьадихьван иджласад гвалах лабтIури.
Насир ИБРАГИМОВ
