5-хьусды мартас, ми сивид вазыра ихьды редакциеди йыркьыр ай Мыха1бишды дур-ун ад шаир Рамазанова Бийзат Султанаевна. Бегеде виъид хьылешды 8 Мартад байрамас гюре гьание хайиш гьыъыр ихьды баш редакторада Тимур Махмудовада газетала хьуъ джус йыгара, хьур, гьамыъды джигьил рышбишис ва гадийшис гьаъас угутад ч1елбыл. Гьание мисе гьухьур:
— Инсындида балад карбыр а йик1ыыла утха гьаъас руъуд, амма са Ватан, вы гьухуд Ер, саки Нин йик1ыыла урхаддиш. Гьадид сирдихьде гъийгъадыйкьама баладбыр гедкьырдиш. Йис хьуйне, шудаъ вы варлыд, быт1рад у1лькуьды ешемиш йиширки, выды ватан некьихьдеки, дуьнйадыки уликла сувургаддиш.
Ми Нин рухьуд хьибды ха1рфахда ад деринвалдыбыр, мизид ширинвалдыбыр, са джук умудкивалды лап баладбыр йиъи. Гьадихьде е гедкьаси нин мардишды за изды шиъирма кихьид кал:

Нин кал быт1рад вышне адиш,
Йик1 ниндыкалды гьалдына адиш.

Нинды къадри ад духарыс – ришидки викиси, рышедки викиси, къариедки викиси.Эвела рухьуд йиъий: «Нин рикьид – йыва етим, дид йикьид – сада етим и».

Ва1 дуьнйады ладгъуд нинис
Икрам, ху1рмет ваъ гьанийис,
Ахиретди ад майдана
Умуд а ва1с ер вишинис.

Бахтывар нин гьад риъи, веледдид суруула йик1 архыйинды:

Дженнетди ху1риер ад багъ,
Нинды нур кагъур ад утагъ,
Выды неве ха1рса быдагъ,
Нинды улик мувугъу1й нагъв.

Изды хайиш йиъи хынимешда: лювгъу1духъунды ху1рмет ваъ нинис сагъды гедене, ра1хмитдис гьархы1йне, хьесым лизене йик1ыы хъыргасна.

Еда вас люджувч1уд ху1рмет,
Багъыш хъаъ, гьамыъки миннет,
Г1а1ляа сибхьуд ширинды ч1ел
Кимабад дагьим муху1бет.

Дуьнйады гъадыхъунды хьылешис хынимер диший – хынимешис нинабашды къадри виший.

Б. МЫХАIДЫ