Ноябрь вазырды киджубрад базарад йыгъ ихьды хуIкимете йишир а «нинды Йыгъ».
Гьа байрам гивхьир ад виъи хынымешис нинды къадри сагьаIл ки балана вацIын бадана, хаIрние джуды нинис хуIрмет артухана выъын бадана ва фикир выъын бадана: кулфатбыр бадана, нине шудаъ кьухьды замхаIт сивирхьерди.
Гьа йыгъа, джандады хынымешила гъайир, сиене нинабашис байрамад сураа къутливалдыбыр гьаъара хуIкиметед идарамыд къуллухчийше ки.
22-хьусды ноябрес, гьа байрамас гюре, мыхаIбишды маданиетед зала йыгыр ай концерт.
Гьади иштрак гьыъыри райондид кьухьды Сулейманов Давуд Амаевиче ки. Гьание концерте йидкьыр ад нинабашис къутли выъыри джуьхьды байрам, гьухьури йыхды чIелбыр.
Хьеликана лалгыри Салманова Индира Рагимовна. Гьание гьухьури: «Гьеми байрамад йыгъа зас артухана кьыле гьаъас йигара специальный военный операцияди иштрак гьаъара ад йигитешис тербие выр ад нинабашды дурубыр…» Къисмат гьыъыри хаIр са ниныс йикIыы гъад мырад игъивкьый хьур, духре сагъ-саламатна сиенебишды халма хъидыкьый, хьур, душмана гъаалиб дишир.
Гьанийила хъуъ гьалгыри МыхаIдид маданиетед Халды директор Абдуллаев Абдулла Муртазаевич. ЙикIыы лихъиере, гьанийды дух Рустави ки СВО-дид иштракчи йиъи.
ЧIелбыр гьухьур бегьем дишида хъуъ, кувчIури концертед программа.
МыхаIаIды дур-ун ад артистеше гьыъыри наIгьнибыр, мукIбыр. Лазим йиъид макьамбыр йыхыIри группа «Аяз»-ад кьавалаше.
Мехьтебед телебийше кьыле гьыъыри нинабашихда хитIир ад бытIрад шиъирбыр.
Маджлис сахъвалхад арыди, баIзибише рыхыIре ай шикилбыр.

Зарема Исрафилова