31 мартас дуьнйады гъадухъунды сиене мусурманаше къутли выъыр ай сивид-сывабад байрам. Ихьды республикади гьадис гюре выр ай хьибыд йыгъ выхадныймыд.
Гьа йыгъа сиенебише гьыъыр ай садакьабыр, дугьаIбыр, делегбыр ва байрамад суннат кубыр.
ЙаIкваIс сагьаIт мыйдис байрамад куб выъыр ай ихьды МыхаIд Галды мездике ки.
Кубад улихьдегине мездике сытIа дишир ад мусурман шубаI-ришиймаше гьыъыри зикр, такбир ва выр ай хаIр илсынды гъад фитр закаIт. Мисте закаIт йиъий хаIр инсындыла 150 манут. Гьа йыгъа ихьды Галды мездик увцIур ай инсындире.
Кубала хъуъ сытIа дишир абишис къутли гьыъыри сивид-сывабыр МыхаIд имама Абдуселим Таирова, гьыъыри къыле байрамад хутба.
Хьели ихьды джамахаIт къутливалдыбыр гьаъара сасынийыхда халма дуруъура ай, ва сырымы дыхьыр садакьабыр, хайир дугьаIбыр гьыъыр ай.
Хынимер ки эккене шад дишир ай, гьисхьурди гьа байрамад йыгъа ийир ай хвабыр. Бала раазине гьабыр гадгъаIре ай маIхлида — маIхлиди ва хала-халма.
Сивид-сывабад хуIрмитис ихьды джамаIхдире сытаI гьыъыр тангабыр лешур ай герляндабыр, хъийир ай гьабыр МыхаI кьухьды гъыIы, ва гьада лаъ дюз Галды мездикед риге йыкьама.
Сиенебишис къутли йиший сивид-сывабыр, гьагъзырды сывабырмы гьадагъуй.

Насир Ибрагимов