Кишды йыгъа, сахьусды февралес, МыхаIд районди йиркьыр ай Дагъыстандид гьыIлимдид не кьылевыъынид министр Яхья Гамидович Бучаев. Гьанийхьван генеки йидкьыр ай джуды заместитель Аида Османгаджиевна Далгатова ва гьыIлимдид министерствадид отделед кьухьды Аймисе Тагировна Акаева.
Йиркьыр мадана министрере выъыри иджлас мехьтебырмыд, садикмыд ва мадды кьылебырмыд идарамыд кьухьдыбишихьван. Гьа иджласа иштрак гьыъыр ай райондид кьухьнийды заместитель Арсен Кулиева, Гьахтид, МыхаIдид ва Дохъузбарадид районмыд прокурор Магомедрасул Дибирова, райондид гьыIлимдид управлениедид кьухьды Фидель Акимова ва мадды сес выъыр ад юлдашеше.
Гьа иджласа хьуъ гетIир ай суалбыр, шыв хаIле ади кьылебырмыд идарабыр МыхаIд районди, шууна кьыле ваъара ади хынымеше, шууна гыргара ади кьылевыъынмыд процесс, цIинды ва IT- технологиебыр. Шыв куьмег вылцIара ади йыхана кьыле ваъад ва бытIрана спортахьван машхулатвалды ваъабишис. Генеки хьуъ гетIир ай суал патриотический тербиедид. Гьа суалас гюре, хаIр гьаъ, хьури, хынымешис ихьды таарих не гьадатбыр на нубатбыр. Гьа иджласа директорашис ихтияр выр ай джваIршихда ад фикирмыд на цIинды ниятмыд ихтилатбыр гьаъас.
Иджлас бегьем вуруъуда Яхья Гамидовиче выр ай наградабыр сасад маIгьаIлимешис: «Отличник образования Республики Дагестан» награда выр ай Арандид мехьтебед магьаIлимеc Лимунат Курбанисмаиловна Гашимовас, Аады КатIрухад маIгьаIлим Абдулгахир Черкесович Эфендиевас ва «Cолнышко»-хьур дур гъад садикед воспитательницас Диана Ашурбековна Юсуповас. «Почетный наставник сферы образования Республики Дагестан» награда выр ай Мишлешед мехьтебед маIгьаIлим Исмаил Ахмедович Мамедовас ва музыкальный мехьтебед педагог Рейна Сейфудиновна Мамаевас.
Хьели министрере кьабыл дыъыр ай инсанар. Сахьусды йиркьыр ай приема Россиядид Йигит Ибрагим-Паша Садыковды хыдыл Аида Рамазанова ва ЦПВЭД-дид къуллухчи Роза Кузиева. Гьабише дилег гьыъыри министреда МыхаI сихьин бадана цIинды здание ясли-садик «Улыбкадис». МыхаIд спортад мехьтебед директора Мурад Маличаева выр ай суал шыв гьыъыр йигарди кьваIдхьусды мехьтебеде гид спротзалара гвалах ваъас йишин бадана. Хьели йиркьыр ай Яхья Гамидовичехда Сыназырад мехьтебед директор Мансур Гаджибеков. Гьание хьуъ гетIир ай суал шыв аIгьвалат ади Шиназ муIкъаI ваъасды мехьтебед. Министред приема генеки йидкьыр ай районди ад садикмыд кьухьдыбыр — Джамиля Идрисова («Радость»), Лариса Рамазанова («Солнышко»), Людмила Майсарова («Зайка»), МыхаIд сахьусды мехьтебед кьухьды Ямудин Таибов ва райондид акъсакалашды Советед седри Эмин Магомедов.
Сиене миди хьуъ гетIид суалмыд бадана Яхья Бучаева гьухьури — йикисдыбыр джу кьуле гыргаси, джуда джикисдыбыр кьухьдыбишы лийкьа гьаъаси, хьур.
Гьадыла хъуъ министр Яхья Бучаев, райондид кьухьды Давуд Сулейманов ва мадды идарамыд на администрациедид къуллухчиер дыхьыр ай джетинды суалбыр ад Хъылдад мехьтебе. Гьади гьабише выгыр ай мехьтебед коллективехьван иджлас, хъадацури маIгьаIлимешихда, мехьтебед администрациедыхда, гьацIара гьаъас, гьис мехьтебе мисед садаки джишид джетинды суалбывр йишир ади.
Сиенебишыхда хъадацIудыла хъуъ, кьабыл гьыъыри мисед кьарар: луза джаъас, хьур, дарсбыр мехьтебе, аахиред кьарар МКОУ «Хлютская СОШ им. Н.Ф. Алиева» мехьтебе йишир ад гьакьасабад бадаана эгъетIес хьури министре Махачкалди хъыхьыйне.
Насир Ибрагимов
