Гьеми йыгъырма Къархы-ма1хлиде мирияла хьуъ гъад машинед гъа1, дуьз-дуьзгин хъывыъыр, ц1ине хъывыъыр а. Гьа ма1хлиды ешемишды, мисагьа1тди СВО-ди иштрак гьаъара ад эскер — Гаджимурад Рагимова райондид кьухьды Сулейманов Давуд Амаевичда хайиш гьыъыр ай хьуланды гъа1 к1алба-усла хъывга, хьур. Давуд Амаевиче эскер Гаджимурадды дилег, ыхьа1 джыъыр, гьайвырды кьуле йыгыри. Гьание тапширмиш гьыъыри ЖКХ-дид идарадид къуллухчийшис сиене гвалах лазим виъид кал кьуле выгырга, хьур.
Къархы ма1хлиды ешемишды инсанаше,  джва1рше керъир ад депутат, СВО-дид иштракчиед дид Эльбрус Алиевки кине, гъари луьджуьздир, джва1ршида лягъу1д куьмег гьаъара ай ЖКХ-дид къуллухчийшис. Гьабише ари хана гьа гвалах ма1хкамана кьуле выгыри: дуьз хъыъыр эвирбыр, ц1инене гихъийири арахьалбыр, хайлинды цемент1мыд заливкабыр гьыъыри, перилабыр сыхъы1хы1ри, ва мадды ягъа1дкал гвалахбыр кьуле йыгыри. Ха1рне 4-5 йыгъад арыди гьа ремонтад гвалахбыр бегьем гьыъыр, 10 метри ху1ляхвалды на 4 метри а1кьу1рвалды гъад гъа1 ачых хъывыъыри — улихьде гьа  кьыц1ды виъий. Гьамыъ кьухьды машинбыр ки ра1ха1тене ы1йхьаси, укь-ус хъикьасды йишийне. Гьадыла саваенди, Гаджимурадды хатирес ры1къмыд фарбыр ки ац1а хъыъыр, тракторахьван дуьз хъаваъара сиене ра1хъ ми арыдыы ки гвалахак кинидиъи ЖКХ идарадид къуллухчиер.
Къархыбише чух-сагъул, аферин рухьура а Гаджимурадда, кьухьды Ватан ки йик1 сихьир увуху1ре ад, к1аъды ватан ки ари йик1е увуху1ре ад.
Эккед сагъул ваъара а Давуд Амаевичис, дерде а1ч1ур эскеред дилег кьуле йыгыри, хьур. Джурана сагъул рухьура а ЖКХ-дид къуллухчийшде не ма1хлидады гадийшде хайлинды замха1т сивхьир гьа йыхды ва лазимды гвалах кьуле выгыри, хьур.

Зарема Исрафилова